Lafaek News–Komunidade bairo seroja aldeia Golgota la satisfas ho desizaun governu ne’ebé atu hasai komunidade seroja husi hela fatin hodi fó previléjiu ba instituisaun privadu São Miguel Arcanjo no TVE duke nia povu rasik.
Lia hirak nee hato’o husi Portavoz Elvis Martins ba jornalista liu husi press komferensia iha Bairo Seroja aldeia Golgota suku Komoro Postu administrativu Dom Aleixo Munisipiu Dili,
Ami la satisfas ho desizaun governu ne’ebé atu oferese komunidade seroja nia hela fatin ba instituisaun privadu. Haree ba estadu ida ne’ebé hatuur estadu de direitu demokratiku ne’ebé trata nia sidadaun ho iguál no dignu maibé infelizmente trata de’it ema ne’ebé osan iha,’’portavoz Elvis Martins hatoo liu husi konferénsia imprensa ba jornalista relasiona ho desizaun governu atu muda sai komunidadde sira husi sira nia hela fatin hodi harii edefisiu São Miguel Arcanjo, Sesta 25/03/2022.
Elvis husu ba governu atu trata povu ho dignu no laiha deskriminasaun no hatuur povu iha justisa social tuir KRDTL artigo 6 (objetivu estadu).
Ami konsidera desijaun husi governu mosu injustu no laiha utilidade ba nia povu, tan ne’e ami rejeita hodi defende ami nia direitu tuir Konstituisaun RDTL artiguº 54 (direitu ba propriedade privadu) no artigu 58°(hela fatin).
Tuir lei orgániku VIII governu ba fins investimentu boot kona bá arendamentu ba rai no uma estadu ne e kompeténsia ExSIA Ministru justisa maka tetu no desidi, la’ós vise ministru obras públika tanba kompeténsia.
Ami komunidade seroja prontu regula ami nia okupasaun direita ho guvernu através kontratu arendamentu, no la aseita entrega rai ba eskola São Miguel no TVE ne’ebé la konsidera nuudar instítuisaun estadu ida,” Elvis relata.
Nia deklara, Eskola São Miguel no TVE iha finanseiru lukrutivus, maibé durante halo okupasaun iha atuál eskola refere sem-submete iha prosesu kontratu arendamentu ho Estadu (liu-liu ba diresaun jerál terras propriedades – Ministerio da Justisa).
Edifisiu eskola São Miguel no TVE maka impede estadu atu hala’o alargamentu ba estrada nasionál ne’ebé liga husi kapitál Dili ba portu tibar, no piór liu ezije estadu atu kompensa sira nia edifísiu no kustu 1 miliaun 200 mil dolar amerikanu ($1.200.000),” Elvis Haktuir.
Elvis afirma, governu ezije komunidade seroja atu koopera ho estadu hodi halo dezenvolvimentu (sira konkorda), maibé tanba sá? governu la ezije São Miguel atu koopera ho estadu husik hela ninia edifisiu hodi halo konstrusaun alargamentu ba estrada, será ké ida ne’e mak trata povu ho dignu ka hanaran justisa sosiál tuir KRDTL?
Estadu ida ne’ebé hanaran estadu de direitu demokratiku ne ebé garante sustentabilidade, tanba sá tenki fó oportunidade atu kria estadu kapítalista, mesmu indireta maibé psikolojikamente hatudu duni,” nia afirma.
Jornalista : Orlando Magno
Editor : Agapito de Deus
