Lafaek News–Komisaun Organizador (KO) konstrusaun Igreja parókia Aimutin, Cesar Vital Moreira, informa komisaun simu ona osan hamutuk U$ 480 mil (Quatru Centus e Oitante Mill dolares) husi Dioseze Dili hodi kontinua servisu ba Igreja Aimutin.

Últimu pagamentu ne’e liu husi SET dioseze nian, ami organiza hela oinsá mak servisu bele la’o fali iha fulan oan, osan ne’ebé tama ne’e Quatru Centus e Oitenta mil, ne’e hanesan últimu pagamentu ba 3 milloens ne’ebé ninia restu, 480 mill ne’e kuaze seisenta setenta porsentu sei selu ema nia tusan, no ninia restu ami uza hodi halo servisu moru haleu hodi proteze Igreja inklui servisu iha laran,’’ katak Cesar Moreira ba lafaek news, iha Pantai Kelapa, kinta (17/03/2022).

Cesar esplika, bainhira eleisaun prezidensiál ne’e liu tiha sei kontinua halo kompleta plafond no asessores ordenamentu liu husi osan ne’ebé nia simu ona husi dioseze Dili, tan ne’e gastu osan ne’e hodi kompleta buat hotu iha Igreja laran, maske servisu sei maibé sei finaliza.

Baihira ami gasta osan ne’e ami sei halo fali relatóriu ba dioseze, sosiedade sivil tuir mai inspesaun husi ADN nian atu oinsá komisaun bele buka fali osan restu ne’ebé ita sei presiza halo hotu ba Igreja ne’e, tanba  Igreja ne’e nia kustu total 4.8 milloens, osan ne’ebé ami simu husi governu millaun 3 de’it, klaru ami sei presiza 1.8 milaun,’’ nia relata.

Prosesu servisu ba Igreja refere husi inísiu too ohin loron atinje ona porsentu 82, maibé osan milaun 3 ne’ebé simu husi governu tuir lolos ba de’it porsentu 62, signifika iha dívidas ne’ebé tenke selu, tan ne’e osan ne’ebé komisaun simu sei gasta ba servisu balun, no restu presiza diskute ho dioseze atu halo planu hamutuk  ho komisaun atu bele tama iha orsamentu foun.

Nia dehan, prosesu tuir mai kontinua halo kontribuisaun husi sarani sira atu responde ba asesores ho servisu kiik hirak ne’ebé presiza kompleta, kontribuisaun husi sarani sira kada ema $.5 too $.10, inklui ema balun la’os pertense ba parókia ne’e maibé fo envelope inklui ema estranjeiru, posibilidade komisaun organizadór konstrusaun ba Igreja ne’e sei mobiliza hikas rekursu hirak ne’e hotu hodi kontinua halo servisu ba Igreja.

Posibilidade ami bele mobiliza fali rekursu hirak ne’e hodi atende situasaun ne’e, ami fiar katak mezmu dioseze ami diskute hamutuk atu halo planu foun kona-ba orsamentu ne’e nia restu, más karik mós kada tinan fo la’os kompletu, pelu menus 1,8 ka uituan atu ami bele buka dalan servisu ne’e labele para, ami hanesan komisaun haree hela buat hirak ne’e hotu, ita hakarak ho lalais más ami problema ho orsamentu, iha pergunta seluk, imi simu de’it osan porsentu 62, hanusa mak servisu la’o ona porsentu 82, iha esplikasaun rua, ami konsege halo popuansa. Husi servisu anterior ne’ebé kontratu, ami halo quatru sentus e quinze mil, tanba ne’e poupansa ne’ebé ami halo atu garante servisu bele la’o nafatin, ne’e primeiru, segundu servisu ne’ebé ami kontratu ba ALFA Dili seidauk pagamentu hotu inklui servisu anterior estruturua husi SDN mai halo ami seidauk selu hotu, tanba ne’e servisu nia persentajen sa’e ho razaun poupansa ho dívidas, tanba ami seidauk selu ema sira ne’e hotu, hau hanoin ho pagamentu ne’ebé ami halo servisu karik bele la’o menus porsentu 85, más ita hakarak ema nia dívidas tenke rezolve, ida ne’e hanesan rekomendasaun hus dioseze atu ami haree ema dívidas, bainhira tama iha orsamentu foun lakohi atu selu de’it dívidas, ’’nia justifika.

Ikus liu, Cesar Moreira husu sarani parókia Aimutin atu pasiénsia uituan, eleisaun liu tiha servisu sei kontiua halo, maske kontratu ba konstrusaun Igreja ne’e multi-anual, maibé komisaun organizador sei aselera atu oinsá bele entrega ona ba dioseze hodi inaugura.

Jornalista : João Soares

Editor       : Agapito de Deus