Lafaek News—Reuniaun Konsellu Ministru kuarta (12/05/2021), deside extende serka sanitária ba loron 14 iha munisípiu tolu kompostu husi Dili, Baukau no Kovalima.
“Serka Sanitária iha munisípiu Baukau, Kovalima no Dili ba loron 14 tan, no mantein mós impozisaun konfinamentu obrigatoriu iha munisípiu Dili ba loron 14, konsellu ministru deside ona la renova impozisaun serka sanitária, ne’ebé sei vigora to loron 16 maiu, iha munisípiu Ainaro, Ermera, Lautein, Likisa, Manufahi no Vikeke,” esplika Ministru Prezidensia Konsellu Ministru(MPKM) Fidelis Magalhães, ba jornalista sira iha Ministeriu Finansas Ai tarak laran, kuarta (12/05/2021)
Fidelis Magalhães hatete, hafoin analiza aprezentasaun husi koordenadór Sentru Integradu Jestaun Krize kona-ba pontu epidemolójika iha Timor Leste, Konsellu Ministru aprova kedan projetu sira rezolusaun governu nian ne’ebé mantein impozisaun serka sanitária iha munisípiu tolu refere.
“Munisípiu Dili mós mantein nafatin impozisaun konfinamentu domisiliáriu jerál ba ema hotu-hotu ne’ebé hela ka oras ne’e da-daun iha hela Munisípiu Dili,” tenik nia
Enkuantu nia dehan, munisípiu sira ne’ebé númeru kazu as ne’e mak Dili, Baukau no Kovalima, Iha munisípiu sira seluk la iha kazu iha semana 2 nia laran, tan ne’e mak hasai tiha serka sanitária iha munisípiu sira ne’e atu fo biban ba sira para hodi dezloka ba munisípiu sira seluk.
Jornalista : Sandi Belo
Editór : Agapito de Deus
