Lafaek News-Konsellu Ministrus kuarta, (04/08) aprova mós projetu Dekretu Governu, kona-ba alterasaun dahuluk ba dekretu governu ne’ebé refere ba renumerasaun husi Prezidente Autoridades Munisipál.
Ministru Prezidénsia no Konsellu Ministru (MPKM) Fidelis Manuel Leite Magalhães hateten, diploma ida ne’e hakarak atu adekua remunerasaun Prezidente Autoridade Munisipál no Administradór Munisipál sira ho responsabilidade ne’ebé boot katak dezempeñu kargu nian implika, hanesan reprezentante sira, ba nivel munisipál, husi governu sentrál, ne’ebé kaer responsabilidade sira ba servisu oin-oin ne’ebé fó husi governu ba sidadun lokál sira.
“Ho projetu Dekretu Governu ne’e, hahú husi fulan-janeiru tinan 2022, Prezidente Autoridade Munisipál sira sei simu remunerasaun fulan-fulan dolar amerikanu 1.600 no Administradór Munisipál sira sei simu dolar amerikanu 1.300” informa MPKM Fidelis iha Palasio Governu Dili, kuarta (04/08/21).
Entretantu projetu dekretu governu ida ne’e aprezenta husi Ministru Administrasaun Estatál (MAE) Miguel Pereira de Carvalho.
Jornalista : Juvita dos Santos
Editór : Agapito de Deus
