Lafaek News-Governu liu husi Konsellu Ministrus kuarta, (04/08) delibera hodi aprova projetu rezolusaun governu ne’ebé impoin Serka Sanitária iha área sira ne’ebé abranje husi Suku Naimeco, iha Postu Administrativu Pante Makasar no husi Suku Bobometo, iha Postu Administrativu Oe-silo.
Ministru Prezidénsia no Konsellu Ministru, Fidelis Manuel Leite Magalhães hateten, postu administrativu rua ne’e iha Rejiaun Administrativa Espesiál Oekuse Ambenu, hahú oras 00:00 loron 5 fulan-agostu tinan 2021 to’o oras 23:59 loron 18 fulan-agostu tinan 2021.
“Nune’e, bandu sirkulasaun ema sira-nian entre Suku sira ne’ebé temi no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa publika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian” dehan MPKM Fidelis hafoin remata enkontru KM iha Palasio Governu Dili, kuarta (04/08/21).
Enkuantu la inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivídu sira ne’e.
Jornalista : Juvita dos Santos
Editór : Agapito de Deus
