Lafaek News—Prezidente Parlamentu Nasionál (PN), Aniceto Longuinhos Guterres relata servisu no funsionamentu Parlamentu Nasional nian ba Prezidente Repúblika, Francisco Guterres Lu Olo durante sesaun terseira lejislativu.
Enkontru ne’ebé hala’o kuaze husi tuku 9 dadeer to’o tuku 10 resin ne’e, (04/08) PN informa de’it asuntu sesaun terseira lejislative ne’ebé termina ba Prezidente Repúblika.
“Badak de’it, terseira sesaun lejislativa termina, agora tama ona ba periodu intervalu, nudar Prezidente Parlamentu mai informa relata konaba sesaun lejislativa ne’ebé remata ona ho ninia prosesu hanesan funsionamentu instituisaun parlamentu nian ho nia desempeinu sira durante sesaun lejislativa tinan ida ne’e, ne’e de’it laiha buat seluk maka ami ko’alia,” Aniceto informa bainhira remata enkontru ho Prezidente Repúblika iha Palasiu Prezidente Ai-tarak laran, kuarta, (04/08).
Nia esplika, rezultadu enkontru ida ne’e la presiza atu espesifika asuntu saida de’it, maibé en jeral ko’alia kona-ba funsionamentu Parlamentu Nasionál nian ho nia dezempeñu durante iha sesaun lejislativa ida ne’e.
Resposta Prezidente Repúblika nia kona-ba dezempeinu servisu funsionamentu Parlamentu Nasionál durante terseira lejislative ne’e diak ou la diak ne’e tuir observasaun Prezidente Repúblika nian rasik, diak ka la diak ne’e so Prezidente Repúblika bele hatan.
“Atu di’ak ka la di’ak ne’e orsida PR bele hatan, tanba ha’u labele hateten parlamentu nia desempeñu ne’e di’ak, ne’e ema ida idak halo avaliasaun tuir nia haree nia pontu de vista ba haree nia funsionamentu ho dezenpeinamentu parlamentu nian durante sesaun lejislativa ne’e saida”, Aniceto afirma.
Sesaun terseira lejislative ne’e hahú husi loron 15 Setembru mai to’o 14 Jullu no tuir Prezidente PN nia dehan la konfirma ho lei hirak mak aprova iha terseira lejislative ne’e tuir nia tanba la’os lei ida ou rua de’it, maibé barak liu husi rua liu.
Iha sorin seluk Prezidente PN mos fó nia komentáriu ba informasaun balun ne’ebé ikus ne’e viral katak Singapura lakohi simu Timor Leste atu sai membru ASEAN, ne’e lalos, maibé buat hotu sei iha prosesu nia laran, tuir nia.
“Lakohi ona ka seidauk priense rekizitus, buat hotu sei iha prosesu, Timor Leste ne’ebé foin independénsia no ASEAN moris kleur tiha ona dezde anos 60, ita atu hola parte liu husi prosesu ne’e normal, seidauk bele tama karik ne’e normal,” Aniceto dehan.
Nia mos afirma prosesu Timor Leste atu tama ASEAN ne’e governu mak haten, Parlamentu Nasionál nia pozisaun ne’e Instituisional no parlamentu nia desizaun.
Estajiadu : Simão João Mira Fraga
edit or : Agapito de Deus
