Lafaek News-Kliente hirak ne’ebé ba trata dokumentu ka halo no renova kartaun eleitorál foun la kumpre ba regra estadu emerjénsia ne’ebé prevee iha dekretu governu maski hosi parte Sekretariadu Tékniku Administrasaun Eleitorál (STAE) prepara hela fatin ba fase liman no avizu tenke uza máskara no distánsia fíziku.
Tuir observasaun jornalista Lafaek News iha terenu nota kliente hirak ne’ebé mai trata kartaun eleitorál no atu halo renova, balun de’it mak uza máskara no halo distánsia fíziku más barak liu maka la kumpre ba regra ne’ebé prevee iha dekretu governu.
Entretantu bainhira dada lia ho Diretór Sekretariadu Tékniku Administrasaun Eleitorál (STAE), munisípiu Vikeke, Humberto Fernandes katak, fasilidade tuir protokolu saúde nia orientasaun sempre prepara, maibé kliente sira mak dezobedese ba regra ne’ebé prevee iha dekretu governu nia laran.
“Fatin iha ne’e prepara duni oinsá atu prevene moras covid19 labele tranzmite, hodi tuir regra ne’ebé estabelese ona katak tuur do’ok malu pelumenus metru 1, maibé ita nia komunidade ka eleitór sira mak la kumpre duni regra hirak nee,” Diretór STAE Humberto ba Lafaek News iha nia knaar fatin, segunda (11/01)
Alende ne’e nia mós informa kona-ba total kliente ne’ebé mai rejistu iha tinan 2020 hodi trata dokumentu ka halo kartaun eleitorál foun no renova hamutuk Rihun Rua Resin.
Reforsa nia, tanba ne’e hahú tama iha tinan 2021 parte STAE hahú halo atendimentu ba kliente hirak ne’ebé mai rejistu ona.
Biban ne’e mós tuir observasaun iha edifísiu Notariadu munisípiu Vikeke nota mós komunidade hirak ne’ebé ba trata Sertidaun RDTL no Billete Identidade (BI) barak mak la kumpre ba regra ne’ebé iha hodi prevene pandemic COVID-19.
Reportajen : Abrão da costa S. Martins
Editór : Ezequias Tomás
