Lautém-(Lafaek News)—Imposadu administradór munisípiu Lautém, Domingos Savio, afirma nia parte husu populasaun munisípiu ne’e evita kór polítika atu servisu hamutuk dezenvolve Lautém ba oin.
Domingos Savio kasu lia ne’e ba jornalista sira bainhira remata serimonia tomada de posse ba kargu administradór munisípiu Lautém iha tuku 10 dadeer OTL iha salaun munisípiu Lautém hodi troka administrador sesante Zeferino dos Santos Siqueira.
Administrasaun munisípiu Lautém ne’e afirma servisu dahuluk ne’ebé sei hala’o mak reuniaun ho funsionariu sira oinsá planu adekuadu hodi ezekuta servisu ne’ebé sei orienta husi governu nasionál.
“Ha’u husu ba ema hotu iha munisípiu Lautém atu servisu hamutuk hodi lable haree ba rasa, kór polítika unidade nafatin atu lori Munisípiu Lautém ba oin,estrada aat iha vila Lospalos to area rural sira ne’e iha ha’u nia kakutak, iha 2021 orsamentu iha ona pois mak hare tok estrada ne’e, ha’u sei kontinua mós servisu sira ne’ebé husik hela husi administradór tuan nian, ba ajente estadu hotu no ba povu tomak atu halo dezenvolvimentu iha Lautém la’ós ema ida de’it maibé ema hotu tenke servisu hodi lori dezenvolvimentu ba rai Lautém,” Domingos Savio akresenta.
Administradór foun ne’e kompremte fó apoiu tomak inisitiva juventude Lautém oan ne’ebé namkari iha rai laran no liur iha ne’ebé inisia ona atu harii uma tradisionál ne’ebé nu’udar identidade Lautém iha Timor Leste.
Enkuantu iha selesaun ba administradór munisípiu ne’e iha kandidatu ema na’in rua mak liu iha selesaun Domingos Savio atual administradór Munisípiu foun no Jacinto da Costa mak sei asume kargu hanesan sekretáriu munisipiu Lautém.
Jornalista : Elidio Castro
Editora : Nelya Barros
