Lafaek News—Prezidente Konsellu Imprensa (KI), Virgílio Guterres “Lamukan”, hatoo protesta instituisaun Polísia Nasional Timor Leste (PNTL), atu dada hikas karta notifikasaun ne’ebé entrega ba Jornalista média diáriu Jornal independente.
Dirjente Konsellu Imprensa ne’e dehan, liuhosi konferensia imprensa ida ne’e atu hatoo pozisaun Konsellu imprensa nian hanesan Asosiasaun Jornalista nian, ba dahuluk KI hatoo protestu makaas tebes ba PNTL, ne’ebé halo notifikasaun ba kolega Jornalista na’in rua.
“Nota protestu ne’e tanba referensia ne’ebé sai baze notifikasaun ne’e sai kódigu penal, la’os lei komunikasaun sosiál i asuntu ne’ebé sai foku ba karta notifikasaun ne’e kontéudu jornalistika nian, tanba ne’e mak ami nia protestu ne’e makaas tanba ida ne’e konsellu imprensa konsidera hanesan tentativa atu kriminiliza produtu jornalistika,” dehan Presidente KI Virgílio Guterres, iha salaun edefisiu KI Kintal Boot, tersa (25/10/2022). https://www.lafaeknews.tl/pntl-la-retira-karta-notifikasaun-husi-redasaun-independente-ajtl-ameasa-lansa-asaun-pasifiku/
Entretantu Virgílio Guterres fundamenta razaun Konsellu imprensa hatoo protestu ne’e bazeia ba lei komunikasaun sosiál ne’ebé iha.
“Ami hatoo protestu ne’e tanba desde 2014 too mai agora estadu iha ona lei espésifiku atu regula kona-ba lei komunikasaun sosial lei nu.5/2014, ne’ebé iha lei nia laran ko’alia kona-ba aplikasaun ultiliza direitu da resposta no direitu da retifikasaun tán ne’e tuir konselu imprensa nia hanoin no sosializasaun barak liu bá PNTL, ami ko’alia katak asuntu ne’ebé relasiona ho kontéudu jornalistika nia no notisia ninian tenki rezolve ho utilizásaun direitu resposta nian”haktuir Prezidente KI Virgílio Guterres.
Tanba ne’e, husu komandu Jerál PNTL atu retira hikas karta notifikasaun hodi refere fali asuntu ne’e ba orgaun konsellu imprensa ne’ebe nu’udar mahon ba media hotu iha Timor Leste.
“Ami husu ba komandu Jerál PNTL atu retira karta notifikasaun ne’e, i ko’alia kona-ba kontéudu ne’e husu ba komandu Jerál PNTL atu refere asuntu ne’e mai konsellu imprensa katak iha parté ruma halo keixa ba PNTL kona-ba kontéudu notisia ninian ami husu PNTL atu refere mai konsellu imprensa, sé kestaun krimi nian ne’e parté polisia nian bele lori ba misteriu Publiku, sé ko’alia kona-ba kontéudu jornalistika no etika ninian favor refere mai konsellu imprensa nian tanba konsellu imprensa hanesan entidade ne’ebé harii bazeia ba lei atu tau matan ba konduta jornalistika i tau matan ba orgaun konduta lei komunikasaun sosial nian,” katak eis kandidatu PR 2022-2027 ne’e.
Jornalista : Zita Menezes
Editór : Agapito de Deus
