Lafaek News—Portavoz Asosiasaun Jornalista Timor-Leste (AJTL), Zivonia Vieira afirma bainhira komandu jeral Polísia Nasional Timor Leste (PNTL) la retira karta notifikasaun husi jornalista nain rua jornal Independente AJTL hamutuk ho asosiasaun rua TLPU ho UPJTL sei lansa asaun pasífiku iha capital Dili.
Portavoz AJTL ne’e hatoo asuntu ne’e liuhusi konferénsia imprensa iha sede AJTL Fatuhada-Dili, segunda foin lalais hodi husu komando Polísia Nasionál Timor-Leste(PNTL) hapara haruka karta notifikasaun ba redasaun jornál Independénte, no husu atu uza lei komunikasaun sosiál hodi resolve kazu sira ne’ebé iha ligasaun ho produtu Jornalistiku.
Porta-voz AJTL Gevonia, hateten, Polísia Nasionál Timor-Leste (PNTL) nia kna’ar notifikasaun ba Redasaun Jornál Indepéndente relasiona ho notísia edisaun 11 outubru 2022 ho titúlu “ Ezijénsia Demite Gastão, Komisáriu Mateus Simu Karta Husi MJ no Vise MOP” no notísia ho titúlu “ Deskonfia Vise MJ Haruka Karta ba Komando PNTL Atu Demite Gastão” nu’udar aktu represivu ne’ebé rejime ditadura hanesan orden ba uza iha tempu okupasaun indonezia hodi hanehan jornalista no média atu labele fó sai lia-loos. Tanba ne’e aktu komandu jerál PNTL nian ne’ebé notifika xefe Redasaun ho jornalista Indepéndente, Jorgino dos Santos no jornalista Domingos Gomes uza kodigu penal ne’e, la’os dalan demokrátiku, tanba ne’e notísia sira ne’ebé jornál indepéndente publika ne’e produtu jornalizmu ne’ebé bazeia ba faktus, la’os aktu krime no ida ne’e nu’udar parte ida husi papél média kontola sosiál nian hodi hakonu sidadaun sira nia diretu atu asesu ba informasaun loloos no kredivél ba servisu públiku hotu-hotu.
“Asosiasaun Jornalista Timor-Leste (AJTL) ne’ebé durante ne’e halo advokasia ne’e hodi promove no hametin liberdade imprensa no liberdade espresaun iha nasaun demokrátiku ida ne’e hare’e katak, karta notifikasaun husi komando jerál PNTL, servisu investigasaun nasionál ne’ebé dirije ba Redasaun jornalista independente, Jorgino dos Santos no jornalista Domingos Gomes, nu’udar tentative no ameasa ida ba independente jornalizmu no liberdade imprensa iha artigu 40 no 41 iha konstituisaun Republika Demokrátika Timor-Leste (RDTL)”, dehan porta-voz AJTL
Porta-voz AJTL haktuir, atu proteje kualidade Demokrásia no halo povu Timor-Leste sai maduru-liu iha demokrásia, papél médi, sosiedade sivil, no sidadaun hotu iha momentu ne’e nesesáriu tebes, tanba ne’e kualidade demokrásia garante bainhira komunikasaun di’ak entre povu ho sira ne’ebé ka’er ukun, liuhusi liberdade espresaun nu’udar instrumentu demokrátiku ida ne’ebé média, sidadaun no sosiedade sivil sira sei halo ninia funsaun kontrolu sosiál ho di’ak, bainhira liberdade espresaun ho liberdade imprensa garantidu. Tanba liberdade espresaun ho imprensa akontese de’it iha nasaun sira ne’ebé demokrátiku la’os iha nasaun sira autoritáriu no ditadura, liberdade espresaun ho liberdade imprensa mak bele garante demokrásia, demokrasia sein liberdade imprensa ho liberdade espresaun ne’e la’os demokrásia ne’e autoritáriu no ditadura.
“Asosiasaun Jornalista Timor-Leste (AJTL) kontra no kondena notifikasaun husi komando jerál PNTL ne’ebé dirije ba Xefe Redasaun jornál Indepéndente,Jorgino dos Santos ho jornalista Domingos Gomes, tanba sei hatauk jornalista no média atu halo auto-sensura iha kontestu kobertura no publikasaun notísia sira iha futuru. AJTL konsidera karta notifikasaun ida ne’e hatudu katak komandu jerál PNTL la afavor ba lia-loos kona-be intervensaun politika ba instituisaun seluk iha servisu ne’ebé kanál média sira publika, maibé haktuir-liu kompetisaun politíka husi governante no polítiku sira”, tenik porta-voz
Asosiasaun Jornalista Timor-Leste (AJTL), reafirma, sei halo karta be sua exelénsia Prezidente Republika José Ramos Horta, nu’udar premeadu Nobel da Paz no Primeiru Ministru Taur Matan Ruak kona-ba komando PNTL nia karta notifikasaun ne’ebé fó ameasa dadaun ba liberdade imprensa espresaun iha ámbitu Timor-Leste halo preparasaun atu tama be iha ASEAN iha tinan oin.
“Asosiasaun jornalista Timor-Leste (AJTL), husu komando jerál PNTL hapara notifikasaun ne’ebé haruka be Redasaun jornál Independente no husu atu uza lei komunikasaun sosial atu resolve kazu sira ne’ebé ligasaun ho produtu jornalistíku, la’os uza fali kodigu penal hodi kondena jornalista no média tanba notísia la’os aktu krime, tanba ne’e husu ba iha Konsellu Imprensa hodi halo mediasaun ba kazu desputa entre PNTL no jornál independente ne’ebé nia kauza husi publikasaun notísia, tanba ne’e husu ba kanál rai laran fó solidariedade be hodi kontinua publika kazu ne’e to’o hetan solusaun, husu jornalista sira nafatin kumpri kodigu étika jornalistíku no lei komunikasaun sosial ho prinsipiu jornalizmu nian hodi asegura liberdade imprensa no liberdade espresaun iha Timor-Leste”, Rekomenda Porta-voz
Iha observasaun jornalista Lafaek News nian nota katak iha komunikandu imprensa ne’e hetan partisipa masimu husi estrutura AJTL ho membru jornalista sira husi média online sira ne’ebé hola parte iha nasaun Timor-Leste
Estajiáda : Aquelina Caldeira
Asisten : Editor Felipe Soares
