Lafaek News—Providor Direitus Humanus no Justisa (PDHJ), Virgílio Guterres Lamukan, afirma kona-ba kazu joven ida mate iha fulan 5 ba kotuk iha sela detensaun Kaikoli responsabilidade estadu nian.
Virgílio reafirma PDHJ nafatin husu família matebian atu labele lakon esperansa justisa ba vítima ne’ebé mate iha sela detensaun Kaikoli nian husu família kontinua luta hodi hetan dalan justisa.
“Atu fo hatene katak joven Bernado nia mãe ho nia alin ida mai hasoru ha’u iha semana hirak ba kotuk hato’o ninia, inan ne’e hato’o nia preokupasaun, ha’u hanesan providór ha’u hatete ba matebian nia inan katak labele lakon esperansa kontinua luta kontinua kole ho se deit, providór sei halo nia servisu nia servisu ida maka halo komunika ho entidades sira ne’ebé kompetente tanba providór ninia rezultadu investigasaun ne’e tama tiha ona molok ha’u toma de posse,” katak PDHJ Virgílio Guterre Lamukan ba jornalista iha Delta Nova foin lalais ne’e
Eis prezidente Konsellu Imprensa ne’e argumenta, rejultadu investigasaun ne’ebé PDHJ hala’o, haruka ona ba entidades hotu hodi halo prosesu tuir lei ne’ebé mak iha, Parte Providória Direitus Humanus no Justisa mós halo enkontru ona komisáriu Polísia Nasionál Timor Leste (PNTL), hodi hato’o preokupasaun ba kazu ne’ebé joven mate iha sela Kaicoli Dili.
“Depois ha’u mos halo ona inkontru ho komisariu polísia PNTL ho preokupasaun relasiona ho joven ne’ebé ke mate iha sela detensaun no mós eventu sira akontesimentu mosu iha sidade Dili, dehan Lamukan.
PDHJ sei kontinua no akompaña ba kazu ne’ebé hasoru joven ida mate iha sela detensaun no providór la foti desizaun no se mak loos no se mk sala, maibé PDHJ buka hatene kazu ne’e tanba joven ne’e mate iha sela detensaun propriedade estadu ninia ho ida ne’e estadu hodi asume responsabilidade.
“Fo hatene katak providór sei kontinua akompaña kazu ne’ebé ke akontese joven ne’ebé mate iha sela detensaun ha’u hatete providór la iha kompetensia atu identifika se mak los se mak sala maibé providór buka hatene tanba nia mate iha sela detensaun, sela detensaun ne’e propriedade estadu ninia , entaun estadu tenke asume responsabilidade ida ne’e, entaun ida ne’e mak providór ninia kompetensia atu halo,” Lamukan hakotu.
Jornalista : Aniceto Dias
Editor : Agapito de Deus
