Lafaek News-Komisaun Anti Korupsaun (KAK) bolu Kordenador Jerál Manuel Vong deklara Orsamentu ba Ezekusaun programa Expo Dubai ho transparánsia.
Prezidente Komisaun Anti Korupsaun, Komisáriu Sergio Hornai marka audiensia ho kordenador jeral Manuel Vong, hodi diskute kona-ba ezekusaun orsamentu ba programa expo dubai, atu nune’e bele garante boa governasaun.
“Ita husu ba kordenador ho nia kolega sira hotu-hotu no Ministériu relavante atu bele asegura nafatin prosesu sira liliu iha jestaun ezekusaun orsamentu atu bele garante boa governasaun, iha akontabilidade merese uza duni osan ne’e ba iha destinadu ka atividade ne’ebé sira define,” dehan Komisáriu Sergio Hornai, ba jornalisa sira iha farol Díli, segunda, (28/06/2021).
Nia hatutan, defini atividade expo dubai husi governante sira hodi orienta ba iha instituisaun responsavel atu ezekuta, parte komisaun anti korupsaun mós kontinua halo kordenasaun.
“Ha’u laiha kbiit atu autoriza tanba kompeténsia instituisaun seluk nian, maibé ami sempre iha kordenasaun, KAK nia kbiit ida maka konsidera no fo hanoin nafatin ba iha instituisaun estadu hotu-hotu inklui KAK atu kuidadu liu tan iha ezekusaun orsamentu sira, konserteza ne’e orsamentu estadu nian, ha’u ho ita boot sira no sosiedade enjeral tenke akompañia situasaun expo dubai nian,” esplika Komisáriu.
Hatan ba kestaun ne’e, Kordendor Jeral Expo Dubai, Manuel Vong, informa, aprezentasaun ne’e kona-ba programa, planu, no atividade saida deit maka sei halo iha expo dubai.
“Timor nia preparasaun ba iha dubai, ko’alia kona-ba area haat ohin hato’o mós ba komisariu maka, Turizmu no Hospitalidade, Agrikultura no Peskas, Petroleum no Minerais, transportes logistika no infraestrutura,” Nia dehan.
Nia hatutan, iha aprezentasaun ne’e kleur tanba atu prevene duni mal pratika iha programa refere.
“Ita prevene duni, ligadu ho mal pratikas ka hahalok ne’ebé maka lalos, kapasidade hanesan kordenador jeral ami koko para atu servisu lolos nomós benefisiu ba Timor-Leste,” informa nia.
Nia relata orsamentu ne’ebé aloka ba expo dubai ho montante millaun ida, orsamentu ida ne’e mai husi Orsamentu Jerál Estadu no apoiu mós parseiru Uni Emirat Arab (UEA) materiais kalkula ba osan millaun rua resin, tanba ne’e konsidera mós sujestaun husi Komisáriu no Diretores sira atu bele prevene pratika sira ne’ebé naksalak.
Jornalista : Abeka Rai Husar
Asisten Editor : Pedro de Almeida
