Lafaek News—Timor-oan ne’ebé professionaliza an iha area Téknolojika Informasaun no Komunikasaun (ICT-TL), sábadu (03/06/2023), marka diskusaun hamutuk aborda asuntu dezenvolvimentu ICT iha governasaun da-Sia.

Iha diskusaun ne’e Nicho Linux nu’udar moderador iha sorumutu ne’e, afirma objetivu principal husi enkontru ne’e atu haree liu ba ICT nian ne’ebé lidera hela husi TIK-Timor, no planea ba governasaun foun iha espasu atu bele dezenvolve liután ICT iha Timor Leste.

“Objetivu prinsipál ohin enkontru ita bolu ita nia profisional IT sira iha Timor liu-liu iha asosiasaun ICT bolu membru sira ne’ebé mak iha instituisaun governu tantu iha instituisaun privadu bolu mai para atu bele rona hanoin dezenvolvimentu ICT ninian  iha Timor-Leste ne’e iha ona faze ne’ebé.

Ohin diskuti liu kona ba situasaun atual  ICT nian ne’ebé mak lidera husi TIK,” katak Nicho Linux.

Nicho Linux afirma tan, bainhira governasaun foun mak membru ICT balun biban asumi kargu hanesan TIK  ka diresaun espesifiku ruma planu atu hadia eru sira ne’ebé maka iha hodi lori nasaun ba oin.

“Agora ita atu tama ona ba governasaun foun  entaun planu sira ne’ebé maka karik membru ICT balun karik ba asumi kargu sira hanesan TIK ka diresaun espesifiku sira karik saida mak sira bele hadia di’ak liután planu bá oin ninian atu ita bele lori nasaun kiik ne’e bá oin no hadia di’ak atendimentu públiku sira ne’ebé mak presiza,” Nicho Linux iha Linukcia Koffe.

Prezidente ICT, Natalio Raimundo Soares, reforsa programa lubun ida ne’ebé maka planu, maibé tanba situasaun seidauk bele implementa.

“Programa kuaze lubun ida dezde tinan barak nia laran ami planu hamutuk define hamutuk mais tanba sirkuntansia ne’ebé maka la’o entaun ami seidauk bele implementa hotu, maibé planu ho programa sempre ami iha,” katak Natalio.

Hodi dehan,  ICT tau prioridade liu maka interese nasionál no konsidera hanesan projetu konsesual, tanba hanesan Timor oan tenke valoriza idea no inisiativa ne’ebé maka iha.

Iha sorin seluk, Venancio Pinto, nu’udar Fundadór ICT argumenta, iha governasaun foun aera ICT nian prosesu balun ne’ebé maka di’ak mantein ida ne’ebé maka at aumenta, povu barak halerik nafatin ba bee, estrada no eletrisidade, tan ne’e hanoin katak ICT hanesan kompleta de’it, maibé seidauk hatene katak ICT mak presiza tau prioridade,

“Kona-ba diskusaun ida ohin hodi hare durante tinan lima ne’e progresu saida maka  di’ak ita mantein ida ne’ebé la di’ak ita hadia ida ne’ebé maka laiha ita aumenta ou hamosu, tinan lima ba oin ha’u fiar katak governu sempre iha nia planu maibé atu implementa ne’e depende ba prioridade la’ós tanba governasaun hotu tenki tau ICT nu’udar prioridade, nu’udar Timor prontu ba kualker tempu ne’ebé maka estadu presiza, tanba desizaun partidu ne’ebé manán eleisaun, nu’udar Timor oan tenke prontu kualker tempu ne’ebé ke estadu presiza tanba desizaun la’ós ICT nian no la’ós pesoal ida nian maibé desijaun fila fali ba governasaun ka partidu ne’ebé maka manán eleisaun no forma governu,” Venancio hakotu.

Jornalista : Alsino da Costa Madeira

Editor       : Agapito de Deus