Lafaek News–Institutu Nasionál para Defeza Direitu Criança (INDICCA), servisu hamutuk ho Ministériu Saúde (MS) banku de sangue HNGV, realiza atividade doasaun ran hodi tulun labarik sira ne’ebé da-daun ne’e sofre moras dengue inklui moras seluk iha óspital Nasionál Guido Valadares.
Diretora INDICCA, Teresa Maria Freitas hateten, atividade doasaun ran ne’e importante, tanba semana hirak liubá haree kazu dengue sa’e liu-liu ba labarik sira ne’ebépresiza ran no difisíl atu hetan ran, tanba ne’e INDICCA nia papél importante atu fó protesaun ba labarik nia salva-guarda direitu labarik.
Tanba tuir dadus ne’ebé mak ita simu katak labarik kuaze rihun rua resin iha territóriu tomak,i labarik tolunulu resin mak labele salva tanba se’it moras denge,” dehan Diretora INDICCA Tersa Maria Freitas ba jornalista sira iha Timor Plaza Dili, kuarta (16/03/2022).
Atividade ne’e loke ba públiku no sira halo ona karta hodi konvida ministériu hirak hanesan Ministériu Saúde (MS), Ministériu Edukasaun Juventude no Desportu (MEJD), Ministériu Solidariedade Sosiál NO Inkluzaun (MSSI), Sekretariadu Juventude no Desportu (SEJD) atu bele oferese sira nia ran ba atividade ida ne’e.
Iha fatin hanesan, Xefi Departamentu Banku de Sangue, Januario da Cruz Freitas hateten, da-daun ne’e stock ran iha banku de sangue hamutuk pakote 208, husi 208 pakotes ne’e iha pakote 49 ho tipu A+, pakote 49 ho tipu B+, pakote 14 ho tipu AB no pakote 96 ho tipu ran O.
Stock ida ne’e garante hela ba kazu emerjénsia kona-ba denge nian, oras ne’e ran ne’ebé moras denge presiza ne’e ita iha O sanulu, A lima, B tolu, AB laiha, signifika katak pasiente ne’ebé moras ho ran AB duni hakarak ka lakoi familia tenke kolabora hasai ran hodi prosesu ba nia ema ne’ebé presiza,” hakotu Januario Freitas.
Enkuantu atividade doasaun ran ne’e loke ba públiku no sei hala’o durante loron rua, hahú ohin to’o aban loron 17/03/ 2022. Atividade ne’e hetan apoiu husi Timor Plaza no Plan Internasionál.
Jornalista : Juvita dos Santos
Editor : Agapito de Deus
