Lafaek News – Graduada Eva Maria da Silva Pascoal, kontente ho nia susesu ne’ebé hakat liu husi dezafius oi-oin, hamonu manta-wen hakuak nia inan-aman ne’ebé partisipa nia serimónia graduasaun iha Centro Convenções hodi espresa inan-aman Nia kolen selu labele.
Ha’u agradese tanba ha’u hasoru dezafiu oi-oin, maibé ha’u esforsu nafatin tanba ha’u nia inan aman nia hakarak ha’u tenke taka sapeo no ha’u agradese boot ba ha’u nia inan-aman tanba ho sira nia esforsu, sira-nia pasensia, mak ohin loron ha’u bele hetan naran foun,” dehan graduada Eva Pascoal ho matanbeen ba Lafaek News iha CCD, segunda, (31/01/2022).
Eva salienta, antes atu remata prosesu hirak ne’e, nia inan aman halo servisu lahatene kolen, sira lahatene hamlaha no lahatene hamrok, hodi sustenta nia estudu to’o ohin loron hasai lisensiatura iha Institutu Superior Crista (ISC).
Ha’u nia inan-aman servisu nu’udar toos na’in, saida mak sira kuda iha toos sira lori ba faan iha merkadu, lahatene udan, lahatene loron manas, sira pasensia nafatin ba ami oan sira nia estudu, dalaruma ami husu osan la tuir ami nia hakarak, la tuir ami nia hanoin, ami bele hirus sira dehan sira la hadomi ami maibé lahatene katak sira iha nebá terus, hodi buka osan fa’an sasan iha merkadu,” espresa Eva ho matanbeen.
Iha fatin hanesan, inan husi graduada, Juvita Rosa hateten, iha nia fatin agradese ba oan maske sira moris ho vida agrikultór hanesan kuda batar,kuda ai-manas no ai-farina, maibé husi rezultadu hirak ne’e mak ohin loron nia oan susesu.
Agradese ba oan, ami inan aman toos na’in, kuda batar, kuda ai-manas, kuda modo oan sira ne’e maka ha’u lori ba faan iha merkadu, hodi sustenta sira nia eskola,” inan ne’e konta ho matanbeen,.
Inan ne’e preokupa katak, ohin loron nia remata ona nia estudu iha nivél lisensiatura, maibé tuir mai nia sei hetan servisu ruma ka lae.
Ha’u hamonu matanben, hanoin tuir prosesu tomak, ohin loron nia gradua ona, nia sei hetan servisu ruma ka lae, hodi hetan osan hola netik ami nia masin-midar ho kafé ruma ka lae, ida ne’e mak ha’u hanoin, ami mos idade ona,” inan ne’e kolia ho matanbeen.
Graduada Eva Maria da Silva Pascoal husi maun alin hamutuk na’in walu (8), feto haat no mane haat, husi aman Pedro da Silva no Juvita Rosa, mai husi aldeia Mala-hara, suku Muapitine, Postu-Administrativu Lospalos, munisípiu Lautem. Neduni remata nia estudu iha Departamentu Lingua Portugés, Fakuldade Edukasaun, Institutu Superior Cristal (ISC) ho valor 3,43.
Jornalista : Azelio da Cruz
Asisten Editora : Juvita dos Santo
