Lafaek News—Prezidente Republika, José Ramos-Horta, hateten prioridade governu nian tinan 2024 sei rezolve problema estrada hirak ne’ebé problemátika iha baze.
Prezidente Repúblika José Ramos-Horta hatoo asuntu ne’e hafoin ho bainaka husi organizasaun internasionál Asia Region and Humanitaria Programme (BRAC), hala’o vizita iha Postu Administrativu Laklubar munisípiu Manatutu nune’e iha futuru BRAC bele investe iha postu administrativu ne’e.
“Estrada ligasaun mai Laklubar, iha orsamentu estadu 2024, ha’u lakohi membru governu ida mai ko’alia mangame ho ha’u, ha’u sei veta kedas orsamentu ne’e, bainhira la tau orsamentu ba Estrada Laclubar, maibé la’ós deít Laklubar, iha fatin balun tan hanesan iha Fatumea iha fronteira,” hateten Prezidente Repúblika, José Ramos-Horta, ba populasaun sira iha Postu Administrativu Laklubar, munisipiu Manatuto, Sesta (17/02/2023).
Entretantu, Xefe Estadu mos promete atu tau-matan ba problema be mos, eskola no saúde, tanba programa balun kompeténsia husi governu no balun bele mai husi Prezidénsia Repúblika ho orsamentu husi doador sira.
“Rai ne’e potensiál loos, bele kuda ai-fuan oin-oin, uluk ha’u mai iha ne’e sempre sosa abokate no bele aumenta kuidadu Kakatua, tambá iha tempu Portugues dadér-dadér ita sempre rona sira nia lian, agora la iha ona, ha’u ko’alia ona ho governu Austrália oinsa bele mai husik Kakatua rihun ba rihun iha Timor-Leste,’’ informa Xefe Estadu. Ba Xefe Estadu, Laclubar bele sai mos zona turístika ne’ebé atrativu, tanba ne’e presija hare didiak dezenvolvimentu turízmu nian no kuidadu balada fuik sira.
Komunikadu ne’e sita, iha oportunidade ne’e mos, PR Horta informa ba populasaun hotu kona-ba akontesimentu Eklipese totál ne’ebé sei akontese iha loron 21 fulan Abríl tinan ne’e no husu ‘’Inan-aman sira labele pániku, sei akontese loron nakukun la hanesan babain iha óras meiudia.
Molok remata atividade vizita ne’e, Prezidente Repúblika Horta, fahe mos nessesidade bázika hanesan fos no mina te’in, ba ema ho difisiénsia, inklui família vulnerável atus resin.
Komunidade Fernando Malohi husi Suku Orlalan sente kontente ho apoiu husi Xefe Estadu, Lori naran benefisiáriu nian, hato’o obrigadu ba Prezidénsia Repúblika, kontente tebes, bele ajuda hahan ne’e ba fulan balun nia laran.
“Lori naran benefisiáriu nian, ha’u hato’o obrigadu ba Prezidénsia Repúblika, kontente tebes, bele ajuda hahan mai ami iha ne’e ba fulan balun nia laran” tenik Malohi.
Iha vizita xefe estadu nian iha postu Laklubar, fahe mos nesesidade bázika, Premiadu Nóbel ba Páz , fahe mos pasta 100 resin ba estudante eskola ensinu bázika iha Laklubar-Villa.
Jornalista : Rita Moniz
Editór : Agapito de Deus
