Lafaek News—Prezidente Repúblika José Ramos-Horta, akompaña husi Ministru Negósiu Estranjeiru no Kooperasaun, Bendito dos Santos Freitas, realiza enkontru billaterál ho Primeiru Ministru Índia, Shri Narendra Modi, hodi ko’alia kona-bá relasaun bilateral entre Timor Leste ho Índia ba futuru.
Ramos Horta hatoo asuntu ne’e hafoin fila husi nasaun Índia mai Timor Leste, iha kinta 11/01/2024, hafoin partisipa iha simeria Vibrant Gujarat Iha Índia kona-ba aprezentasaun planu estratéjiku dezenvolvimentu nasionál Timor-Leste nian, no prioridade investimentu sira, nune’e bele atrai investidor sira mai TL.
“Enkontru Billaterál ho Primeiru Ministru ne’e para ko’alia liu-liu haree oinsá bele hametin relasaun, parseria,” hateten Xefe Estadu José Ramos-Horta, hafoin fila husi Índia, Kinta-Feira, (11/01/2024).
Objetivu fundamental Prezidente Repúblika José Ramos Horta ho Primeiru Ministru Índia ninia diskusaun ne’e haree liu ba oinsá estabelese Embaixada Índia iha Díli no Embaixada Timor-Leste iha Delhi.
“Hanesan ita-hotu hatene, Orsamentu Jerál Estadu Timor nian, husi Ministériu Negósiu Estranjeiru nian iha ona orsamentu para loke Embaixada iha Delhi no mós iha Abudabi, Kapitál Federal United Árabes Emirates, Iha área barak ke ami explora ho Primeiru Ministru no Ministru Negósiu Estranjeiru Índia nian no mós ho setór privadu lubuk ida ke sira interesadu los hakarak mai halo investimentu unkluindu agrikultura e tursimu, ha’u kontente, iha publisidade boot los iha Índia kona-bá Timor-Leste, Primeiru Ministru Índia komprometidu hakarak apoia, hanesan Ministru Negósiu Estranjeiru hatete ba ha’u, nia hakarak vizita mai Timor-Leste, klaru, ha’u sei reporta relatóriu ba Primeiru Ministru no ba setór ministerial hanesan, edukasaun, saúde mak sei halo follow up,” Horta relata.
Xefe estadu Timor Leste ne’e relata, iha area saúde Índia importante teb-tebes, la’ós de’it produsaun ai-moruk, maibé produsaun ekipamentu médiku ne’ebé hanesan Europa nian, Amérika Nian, Japaun, dezenvolvidu teb-tebes iha setór ospital ultra-modernu. Sira hatete, prontu bele kontribui moderniza setór saúde iha Timor-Leste.
“Iha Abudabi fulan ruma ona ne’ebé husi Ministériu haree ona uma, prepara buat hotu-hotu, agora hein de’it desizaun definitivu kona-bá Embaixadór ita nian, Primeiru Ministru ho ha’u aprova haruka pedidu de agremão para Embaixadór ne’e aranka ba ne’ebá, Kona-bá Índia, konforme de’it ho Ministru Negósiu Estranjeiru no Primeiru Ministru deside se mak ba Embaixadór e halo desizaun lalais loke Embaixada antes de maio, Juñu, Embaixada ita nian tenke iha ona, ba Abudabi, fulan ida ne’e nia laran, desizaun ne’e tenke halo. Tanba fulan hira ona ita promete atu loke Embaixada iha ne’ebá, fatin iha ona,” Horta hakotu.
Jornalista : Epifania I. Pinto
Editór : Agapito de Deus
