Lafaek News—Prezidente Repúblika José Ramos-Horta, hateten vizita Singapura, hodi ko’alia kona-ba adezaun bá ASEAN no aumenta kooperasaun iha área formasaun no investimentu tanba ekonomia atu la’o diák presija iha investimentu barak.
Asuntu ne’e hato’o husi Prezidente Repúlika, José Ramos-Horta Kinta-Feira ne’e bainhira, hasoru malu ho Nia Homólogu husi Singapura, Halimah Yacoob no Primeiru Ministru Singapura, Lee Hsien Loong iha Palásiu Orchard Rd, Lafaek News asesu komunikadu husi média Palasíu Presidensiál Sexta( 09/12/2022).https://www.lafaeknews.tl/mne-singapura-no-embaixadora-tl-iha-singapura-simu-ona-vizita-pr-horta/
“Hasoru malu ho Prezidente Repúblika Halimah nu’udár fígura konsensuál no koñesida hanesan advogada ne’ebé sempre luta ba direitu traballadór. Nu’udár mós feto prmeiru no mulsumana ida sai Prezidente Repúblika, Nia (Halimah) hato’o polítika Singapura nian, no kontinua hasoru malu ho Primeiru Ministru Lee Hsien Loong nu’udár oan mane husi Lee Kuan Yew”, katak Prezidente Repúblika José Ramos-Horta ( 08/12/2022).
Tuir Xefe Estadu, relasaun bilateral entre Timor-Leste no ASEAN metin no promete atu aposta nafatin iha formasaun rekursu humanu no mós investimentu.
“Timor-Leste no Singapura, iha relasaun ne’ebé metin iha tinan hirak ne’e, rai ki’ik liu Timor, maibé sira hakarak apoiu ita tama ASEAN, nune’e sira hakarak apoia liu tan iha area formasaun no hakarak hare investimentu bo’ot liu iha Timor-Leste. Ida ne’e mak objetivu viájem mai Singapura, hodi koalia kona-ba adezaun bá ASEAN no aumenta kooperasaun iha área formasaun no investimentu tanba ekonomia atu la’o diák presija iha investimentu ne’ebé barak,’’ Informa Horta.
Ramos-Horta fó hanoin fali katak, Singapura hala’o operasaun missaun ba pás ONU dahuluk iha Timor-Leste iha tinan 1999, maibé Timor-Leste la iha kooperasaun iha area seguransa ho Singapura, maske iha kooperasaun solida ho Amérika, Nova Zelándia, Austrália no Portugál.
“Prefere atu kria kooperasaun iha area seguransa no defeza liu-liu iha matéria servisu sekreta (Intelijénsia) hodi kombate krime organizadu, fase osan (money laundry) no droga, tanba Singapura experiénsia makaas iha área ne’e no mós apoia Timor-Leste iha área formasaun diplomátika, hodi reforsa adezaun Timor-Leste ba ASEAN, Kooperasaun iha seitór seluk ne’ebé Xefe Estadu konsidera importante mak, funsionamentu administrasaun públika, tanba Singapura okupa pozisaun dalima iha mundu, nasaun ne’ebé funsaun públika di’ak liu”.
Xefe Estadu mos relata ba nia Homólogu no Xefe Governu husi Singapura kona-ba progressu husi situasaun ekonómika, dezenvolvimentu Greater Sun Rise no situasaun trankuilidade iha Timor-Leste tanba la iha ameasa, violensia polítika, relijiaun, diskriminasaun étnika.
“Konforme ita rona husi CEO Woodsite nian, problema uluk hanesan obstákulu ba pipe line mai Timor, agora la koalia, ne’e laós ona problema. Problema de’it mak finansiamentu, ne’e Timor bele mobiliza atu investe iha Greater Sun Rise, Ne’e hanesan ha’u esplika jerálmente nu’udár porta-vóz Estadu nian, sira (singapura) interesadu los ho ida ne’e, emprezáriu sira husi singapura hakarak partisipa,’’ tenik Ramos-Horta.
Ba Oin, Horta promete atu kontinua dezafia governu no Trade Invest Timor-Leste atu promove Timor-Leste tanba iha koolaborasaun di’ak entre Líder sira no iha estabilidade polítika.
Hafoin vizita estadu ba Palásiu, Xefe Estadu mós hato’o palestra iha Marina Bay Sands Expo & Convention Center hodi hato’o konabá Timor Leste nia experiénsia iha rezolusaun konflitu, rekonsiliasaun, demokrasia no integrasaun iha Rejionál.
“Ha’u halo aprezentasaun Istória Timor nian, iha tempu luta ba independénsia hahu iha 1975-1999, inklui prossesu rekonsiliasaun no oinsa lidera luta husi husi Maun Bo’ot Xanana, nia ho nia autoriedade moral , nia mak lidera prossesu rekonsiliasaun, ne’e sinál diak. Iha Rai barak ha’u sempre dehan, Timor sai modelu rekonsiliasaun ne’ebé la iha odiu malu tanba Timor-Leste ho Indonésia la iha odi naruk, simu malu. Rai barak difisil tebes simu malu iha tempu badak hafoin ukun-rasik-án,’’ Dehan Horta.
Entetantu Remata palestra, Xefe Estadu hamutuk ho delegasaun, kontinua fila ba Istana hodi partisipa iha jantar Estadu ne’ebé oferese husi Xefe Estadu Singapura, antes vizita ofisiál ba Palásiu, Prezidente Repúblika hala’o uluk atividade kuda ai-funan iha jardím Botanic husi Singapura nu’udár kultura husi alta entidade ruma husi nasaun seluk mai Singapura.
Jornalista : Rita Moniz
Editór : Agapito de Deus
