Lafaek News–Prezidente Repúblika José Ramos Horta hatoo pedidu ba Tribunál Rekursu, husu atu hala’o revizaun antesipatória kona-ba konstitusionalidade hosi proposta lei kona-ba responsabilidade Prezidente Repúblika nian.
Prezidente Repúblika, haktuir termu sira hosi artigu 149 hosi Konstituisaun RDTL, loron 06/06/2022 hatama pedidu ba Tribunál Rekursu, husu atu hala’o revizaun antesipatória kona-ba konstitusionalidade hosi proposta Lei kona-ba Responsabilidade Prezidente nian”, dehan Prezidente Repúblika Josè Ramos Horta liuhusi komunikadu media Palásiu Prezidensiál ne’ebé mak jornalista asesu iha loron segunda 06/06/2022..
Iha komunikadu ne’e Horta hateten pedidu ne’e hatuur-hakerek fundamentu sira hodi kestiona konstitusionalidade hosi proposta lei refere, hirak-nee inklui fundamentu relasiona ho violasaun artigu 1, 16 , 30, 67, 85 95, no 97 hosi Konstituisaun RDTL.
Nuudar Xefe Estadu no símbolu no garantidór ba independénsia nasionál no unidade estadu no mós ba funsionamentu loloos hosi nia instituisaun demokrátiku sira, konstitusionalmente konsagrada, Prezidente halao hela knaar esensiál hodi asegura funsionamentu normál no saudável hosi nasaun nia instituisaun sira”,dehan PR Ramos.
PR afirma, preventiva mak dalan ida liuhosi neebé Prezidente mak ezersa nia influénsia no halao nia funsaun nuudar garantidór ba ukun lei. Nia bele halao nia devér solene nee tomak mesak deit liuhosi diálogu kontínuu no ho kooperasaun hosi Tribunál.
Iha posibilidade katak Lei Responsabilidade Prezidensiál bele hamosu situasaun iha-neebé sala interpretasaun ka sala komprensaun kona-ba ezersísiu prezidensiál hosi majistrásia influénsia iha sirkunstánsia espesífika bele rezulta ho dezviasaun rekursu sira hosi rua-hotu Prezidente no Parlamentu, dezviasaun hanesan nee bele impede governu, Prezidente no Parlamentu sira-hotu nia dezempeñu ba sira-nia funsaun loloos haktuir Konstituisaun”, esplika PR Horta liuhosi komunikadu media Palásiu Prezidensiál.
Jornalista : Rita Moniz
Editór : Agapito de Deus
