Lafaek News—Mane metan midar ladún as liu no ladún badak liu, oin sempre hamnasa ba ema hotu, idade 19 husi rai-ketan Oe-kusse.
Mane klosan ne’e, ho nia prinsipiu moris la hanesan, maske inan-aman iha rai dook, presiza hakur tasi husi ró ahi leten la’o kalan too dadeer-san loron nurak foin sama ain iha raii ketan lulik ambenu Oe-kusse, loos duni, sente susar bainhira hadook an husi inan-aman mai Dili buka matenek.
Susar tebes, iha tempu ida sente susar liu ba osan hodi hatan netik ba moris loro-loron nian, bolu Papa-ho Mama nia naran la simu ka la hatan lalais, tanba iha hela rai dook ne’eba, mane oan metan midar ne’e dulas nia hanoin no kakutak oinsá labele laran metin ba inan-aman be iha rai dook, nia hamosu dalan diak ida atu hakat ho esforsu tomak oinsá bele hetan osan, dulas kakutak la saugate, rezultadu diak tebes ba nia mak fan haas ne’ebé koa pedasuk-pedasuk oan, tau iha plástiku mutin laran falun rua folin sentavus 25, tau iha balde laran tutur no tula ba kbaas leten la’o hadulas sidade Dili, no husi Masin-Lidun ba fatin turizmu relijiozu Saun Paulo II Tasi-Tolu hodi fan hetan netik osan dolar ida ka rua iha loron ida.
Maromak fo duni bensaun no grasa diak husi esforsu Oe-kusse oan ne’e, loron ida hetan dolar 9, sentavus 50, rendimentu loron-loron nian, halibur hamutuk too fulan hodi selu eskola no selu mós uniforme eskola nian, tanba da-daun ne’e, joven idade 19 ne’e hala’o hela nia estudu iha Universidade da Paz (UNPAZ), fakuldade saúde públiku, departamentu reprodutiva.
Nia mak, Blasco Oqui, husi aldeia Maunaben suku Kunia, postu administrativu Pante Makasar, Rejiaun Administrativu Espesiál Oe-kusse Ambeno, oan husi Jacinto Oquy, no Cesilia Sila, ne’ebé da-daun iha hela moris fatin Maunabe, husik oan mane mai Dili buka matenek hodi kontribui ba dezenvolvmentu setor saúde RAEOA no Timor Leste, iha futuru mai.
“Estudante labele hein de’it osan husi inan aman,” katak Blasco Oquy ba lafaek news, iha Tasi-Tolu foin lalais.
Folin husi haas ne’ebé nia faan, uza loro-loron selu mikrolete husi Tasi-Tolu ba UNPAZ, hanoin fahe tempu ne’ebé diak, eskola dadeer fila meiudia lori kedan haas faan la’o iha estrada ninin husi Masin-Lidun tuir estrada ba Tasi-Tolu, dala ruma tuir estrada Masin-Lidun ba Largo Lesidere hodi faan.
“Faan aas hosi selu bemo no eskola, labele laran metin ba ita nia inan-aman, tanba iha hela rai dook, bainhira mak haruk osan lalais mai ha’u hodi selu eskola no mikrolete loro-loron, ha’u hela iha Maslidun ho maun sira, dadersan ba eskola meudia fila faan aas, ha’u faan haas ne’e ba eskola, osan selu eskola mos laiha, sae kareta mos osan laiha, ha’u eskola iha UNPAZ foin tama, loro-loron sai husi eskola tenke faan haas, ha’u ba eskola ema la faan, ha’u sosa haas iha Taibessi karon ida 10.00 $ mai too uma koa kik-kiik tau iha plástiku maka foin faan fali, iha plástiku kiik rua sentavus 0.25, plástiku kiik ida sentavus 0.15, loron ida hetan 95 $, ha’u faan haas husi Masin-Lidun ba too iha Saun Paulo II,” Blasco Oquy hatete.
Ikus liu husi dada-lia ne’e, Mane-metan midar ne’e ko’alia, nu’udar estudante situasaun mak hanesan ne’e ona, tenke hasoru, tanba inan ama-mai husi agrikultura.
“Ha’u senti diak hela bele faan haas, inan-aman sei kompletu, maibé ha’u mak hakarak faan haas tanba rejistu iha UNPAZ 20.00 dolar semester ida selu 40.00 dolar, bainhira semester 1,2 too 3 selu hotu 275 dolar, hotu tiha selu fali kaus nian 70.00 $ dolar,” Blasco Oquy termina.
Blasco, hatoo nia mensajen kurativu ba estudante maluk sira ne’ebé mai husi rai dook, buka matenek iha Dili, labele halo an ho istilu moris, inan-aman iha foho la’os halo milagre osan, dala ruma sira deve mak selu oan sira nia eskola, diak liu estudante ne’e ema matenek tenke buka dalan oinsá tulun inan-aman labele sente todan.
Jornalista : Arnaldo Nunes
Editor : Agapito de Deus
