Lafaek News- Diretór Jerál Bee no Saneamentu (DGAS), Gustavo da Cruz, afirma parte hotu presiza hadi’a linguazen ne’ebé hatete kapitál Dili maioria krize ba bee moos, tanba iha realidade bairru balun de’it maka halerik bbee moos.
“Ha’u hanoin ita, ha’u tenta atu ita bele hadi’a ita nia linguazen sira dehan katak sidade Dili la iha bee, ne’e ita bosok malu,” DGAS Gustavu relata ba jornalista sira foin lalais ne’e iha edifísiu HAK Farol-Dili.
Nia afirma, klaru katak iha duni halerik más la’ós populasaun tomak iha kapitál nasaun ne’e mak krize ba bee moos.
“Ha’u hatene katak iha halerik, maibé la’ós suku tomak Dili laran. Ne’e la iha halerik, maibé iha aldeia balun, iha bairru balun ne’ebé halerik, Ne’e ita rekoñese,” dehan nia
Tanba ne’e, ita nafatin esforsu halo melloramentu oinsá bele rezolve lalais asuntu refere fazeadamente tuir kapasidade orsamentu.
Ikus nia salienta hodi rekoñese, kauza hosi kapitál Dili susar ba bee moos tanba demanda kada tinan sempre aumenta.
“Agora ita iha fulan dezembru, janeiru ne’e sei iha mobilizasaun ka urbanizasaun hosi munisípiu mai kapitál Dili, serka de Dez Mill pesoas tinan-tinan estudante ne’ebé ramata ona nia eskola sekundáriu mai universidade iha Dili. Ne’e hatudu katak tinan-tinan iha aumenta demanda ou permintaan ne’e meningkat maibé ita nia rekursu bee ne’e la aumenta (menus ba beibeik),” tenik nia
Jornalista: João da Costa Soares
Editór : Ezequias Tomás
