Lafaek News—Agrupamentu peskador kompostu ema 50 husi suku Com, postu administrativu Lautem munisípiu Lautem, servisu voluntaria asegura lenuk tolun hodi produz oan atu husik hikas iha tasi area Lautem
Responsavel grupu peskador suku postu Lautem, Lucas Monterio hateten, grupu peskas ne’ebé asegura lenuk tolun too produz lenuk oan, servisu ho voluntáriu de’it atu oinsá kuida lenuk oan sira ne’ebé foin nakfera atu bele moris buras iha tasi parte leste.
“Ne’e grupu konservasaun kompostu husi mane feto kuaze 50 mak iha grupu konservasaun ne’e sira servisu kalan no loron hodi halo konservasaun ba lenuk tolun no oan sira hodi husik fali ba tasi,” katak Lucas Monteiro ba lafaek news iha Lautem foin lalais.
Intensaun peskador hirak ne’e konserva riku tasi bazea ba dekretu governu 2015 kona-ba espesis ne’ebé besik mout ka mohu ona, hanesan lenuk ho dugon, nune’e grupu voluntariu ne’e servisu voluntariu kuaje tinan sanulu resin ona.
“Kada tinan hahú husi fulan Abríl to agustus ne’e grupu tenke hein lenuk inan sai mai tolun kuajae kalan 150 hein de’it lenuk inan sira sai mai tolun nune’e sira foti hodi konserva, ami tenke pro ativu hodi hein lenuk mai tolun, depois konsentra ka tau hamutuk hein fali 60 dias hafoin tolun nakfera no tau hamutuk fali hafoin husik fali ba tasi hanesan ohin ita husik atus ida ba tasi ne’e,” katak Lucas.
Lucas dehan, grupu ne’e laiha finanseriu hodi bele asegura lenuk nia tolun, maibé buka meus rasik hodi halo servisu ne’e, fo han lenuk kiik sira ho ikan ne’ebé grupu ne’e sosa rasik hahan hodi fo han lenuk oan.
“Honestu de’it ami konserva lenuk ne’e hahán laiha maibé ami buka meus, fatin klot no dala barak lenuk oan sira mate tanba laiha espasu fatin ba grupu atu tau lenuk oan sira oksigenu laiha ne’e mós provoka lenuk oan sira latahan no mate barak maibé ami iha komitmentu hodi halo konservasaun kada tinan ba lenuk oan sira ne’e,”xefe husi grupu voluntáriu ne’e relata.
Lafaek News tenta konfirma kedan ho Xefe Departamentu Peskas MAP munisípiu Lautém, hateten nia parte haree de’it, laiha komentariu barak, maibé observa de’it servisu ne’ebé grupu voluntariu ne’e halo.
Entretantu, grupu konservasaun ne’e servisu ho voluntáriu durante tinan 10 ona hodi asegura lenuk oan no lenuk tolun, maibé tuir mós estudu balu hatudu katak lenuk ne’ebé ho idade kiik ne’ebé husik ba tasi, iha amesas boot barak mak mate tanba sira sai fali naan ba ikan boot sira.
Jornalista : CE.Lautem
Editor : Agapito de Deus
