Lautém-(Lafaek News)—Grupu agrikultór aldeia Aibere suku Luro, postu administrativu Luro, munisipiu Lautem, kinta (28/05/2021), koileta Hare besik ektare ida inklui ikan kolam ida ho kuantidade atus 6 ne’ebé hetan apoiu finanseiru husi ajénsia SAPIP ho Ministériu Agrikultura Peskas.
Reprezentante grupu hakiak ikan, Horténcio Auxílio Marques, espresa nia parte sente orgullu ho prezensa SAPIP ne’ebé oferese hodi tulun hakiak ikan, maske hasoru dezafius barak, maibé kontinua esforsu atu halo servisu to hetan rezultadu ohin loron bele koileta ikan hirak ne’e.
“Maske fundus ne’ebé Sapip fo ba ami kiik maibé ami kontinua halo servisu tanba ami hetan oportunidade di’ak liu husi programa Sapip nian liu husi MAP ohin ami bele hetan rezultadu no koileta ona ikan,” Horténcio Auxio Marques ba jornalista sira iha Luro, kinta semana ne’e
Horténcio haktuir, osan ne’ebé grupu ne’e simu husi SAPIP ho montante $2.12,25, hodi utiliza sosa material konstrusaun no sosa ikan hodi hakiak durante ne’e.
“Ami hakiak, iha ami nia grupu ne’e ema hamutuk 18, mak halo kolam ne’e hodi hakiak ikan,” katak nia.
Iha sorin seluk, Administrador Munisipiu Lautém, Domingos Savio, hatoo agradesimentu no apresia grupu agrikultura sira no husu nafatin komunidade sira iha suku no aldeia kontinua servisu makas hasae produsaun iha setór agríkola.
“Programa hakiak ikan, kuda modo, Hare baunila ne’e objetivu ida de’it sustentabilidade ai-han ba komunidade sira, husi rezultadu sira ne’e fo mós rendimentu ekonómiku ba povu agrikultór sira, ha’u husu sira atu halo manajementu di’ak ba grupu sira, atu nune sira bele hamrik mesak,” Domingos Savio afirma.
Nia dehan, ajudus ne’ebé ajénsia sira fo ona grupu agrikutór ne’e hanesan parte ida hanorin komunidade sira bele halo mesak ba nia moris.
Entretantu, partisipa iha atividade koileta hare no ikan iha fatin refere partisipa direta husi administradór Lautem, administrador postu Luro komandante eskuadra inklui grupu agrikultores sira husi postu Luro munisípiu Lautém.
Jornalista : CE.Lautém
Editór : Agapito de Deus
