Lafaek News—Prezidente Komite 12 Novembro, Grigorio “Mouris” Saldanha, ofisialmente lansa muzika rua, 12 Novembru no Sebastião Gomes iha ambitu refleksaun masakre santa krus no husu joven sira atu produs barak liu tan muzika kona-ba istória Timor-Leste nian.
“Parabens ba ekipa heroi da patria, ha’u husu ba maluk joven sira atu halo muzika barak tan liga ho ita nia istória, esperansa tuir mai maka muzika ne’ebé susesu ba ita nia sosiedade atu nune’e atrai joven sira seluk,” dehan Prezidente Komite 12 Novembru, Grigorio Saldanha hafoin lansa muzika no halo refleksaun masakre 12 Novembru iha Santa Kruz, kinta (11/11/2021).
Iha fatin hanesan Fernão Pedro Lebre ‘oan fuik’ hatete, muzika 12 Novembru no Sebastião Gomes nian ne’ebé públika no mós halo reflesaun ne’e atu fó hanoin fila fali ba joven sira hotu.
“Liga ho refleksaun no muzika ne’e atu relembra fila fali istoria uluk, entaun ida ne’e atu fó hanoin ba ita atu labele haluah istória uluk nian,” dehan Ferão.
Enkuantu muzika ne’e rasik hakerek no vokal husi artista Aida Belo Perreira, arasment muzika Elivis Saldanha, poeta husi Dino Hanjam sobrevivente 12 Novembru 1991, akompania video klip husi Max Stahl.
Tuir observsaun jornalista lafaeknews iha terrenu nota, banhira komisaun organizadora loke muzika ho titulu 12 Novembru no Sebastião Gomes, sobrevivente balun hamonu mata ween no dada partisipante hotu nia atensaun akompania muzika refere. Iha reflesaun nemos animasaun husi grupu banda muzika, loke filmajen, apresenta drama, poezia, hasa’e orasaun ikus liu sunu lilin iha semiteriu santa krus.
Jornalista : Pedro de Almeida
Asisten Editora : Juvita dos Santos
