Lafaek News—Sobrevivente Masakre Santa Kruz 12 Novembru, Manuel de Jesus Saldanha ho kodigu ‘Amanu Koku’ husu juventude iha Timor laran tomak tenke kuda espiritu nasionalizmu no patriotizmu iha fuan hodi kontribui ba dezemvolvimentu nasionál.
“Ita agora iha inflitrasaun bara-barak ne’ebe estraga ita nia rai liu-liu ba joven sira ha’u husu ba imi prepara imi nia an ba mai ita hamutuk lolo liman ba malu no kuda espiritu nasionalizmu no patriotizmu iha imi nia fuan no hadomi malu nu’udar timor oan no hamutuk kontribui ba dezenvolvimentu nasional,” dehan sobreviventes Masakre Santa Kruz 12 de Novembru Manuel de Jesus Saldanha ba jornalista Lafaek news hafoin partisipa refleksaun iha simentero Santa kruz, sexta (12/11/2021).
Alende ne’e mós sobrevivente relata, masakre iha Timor-Leste la’os de’it Santa Kruz, maibé iha mós fatin seluk hanesan Masakre mausiga (Ainaro), Dare (Dili), Kraras(Viqueque) no seluk tan iha territoriu Timor laran, maibé laiha evidensia hodi nune’e maka akontesementu Masakre Santa Kruz 12 de Novembru akumula no hatudu ba mundu katak Timor iha nakukun nia laran no hakarak ukun rasik a’an.
“Ita mós tenki fó agradese ba ita nia saudosu Jornalista Max Stahl no jornalista sira seluk ne’ebé maka fó nia a’an tomak ba luta libertasaun nasionál ne’e hodi públika imformasaun ba mundu internasional katak Timor iha funu no ema mate barak no hakarak ukun rasik a’an duni,”nia agradese.
Nia dehan tan, to’o ukun rasik an sobrevivente maioria hetan ona rekuineseimentu husi governu hodi valoriza sira nia luta ba libertasaun nasionál liu husi medalla kondekorasaun no pensaun, maibé sobreviventes balun maka oras ne’e sei verifika hela dokumentos.
“Ami maioria maka hetan ona rekuinesementu husi governu ka estado maibé balun maka seidauk hetan tanba sei iha faze verifikasaun dadus,” Nia imforma.
Jornalista : Manuel Andrade
Asisten Editór : Pedro de Almeida
