LafaekNews-Governu liu husi reuniaun Konsellu Ministrus (KM) aprova projetu Dekretu-Lei, kona-ba kriasaun subsídiu husi fulan juñu to’o dezembru ba jornalista Liña frente ne’ebé durante ne’e fornese notísia sira kona-ba virus SARS-CoV-2, perante estadu emerjénsia, nune’e governu aprova ona kriasaun subsidiu refere, ho montante $.5 dolar kada loron hahú husi fulan juñu to’o dezembru 2021
Ministru Prezidénsia no Konsellu Ministru (MPKM), Fidelis Manuel Leite Magalhães hateten, profisionál sira ne’e hala’o ona sira nia funsaun ho forma ezemplar, hodi kontribui ativamente ba divulgasaun informasaun ida ne’ebé kredivél no nesesária kona-ba prevensaun no kombate pandemia iha territóriu nasionál. Neduni tabela suplementu renumeratóriu ba jornalista liña frente governu aprova $5 kada loron.
“Suplementu nia tabela ne’e, suplementu dolar $5 ba jornalista sira ne’ebé kualifikadu ne’ebé mak nia lista iha ona MAPKOMS i verifika hotu tiha ona nia periodu kobertura husi juñu to’o dezembru,” dehan Fidelis Magalhães hafoin remata enkontru KM iha Palasio Governu Dili, kinta (11/11/21).
Governante ne’e akresenta, lista profisionál sira ne’ebé sei hetan benefísiu iha subsídiu ne’e sei aprova husi despaxu MAPKOMS nian, ho baze iha informasaun ne’ebé fornese husi Sala Situasaun Sentru Integradu Jestaun Krize ka husi Diresaun Nasionál Desiminasaun Informasaun.
Enkuantu projetu rezolusaun governu ne’e aprezenta husi Ministru Asuntus Parlamentares no Komunikasaun Sosiál (MAPKOMS) Fransisco Martins da Costa Jeronimo.
Jornalista : Juvita dos Santos
Asisten:Editór Egidio Nono
