Lafaek News—Akontesimentu inundasaun iha loron 3-4 fulan Abril 2021, ne’ebé estraga populasaun nia sasan no-mos balun lakon vida, maibé to’o oras ne’e husi parte governu seidauk apoiu ruma ba uma kain afetadu ba inundasaun 12 iha aldeia Moris ba Dame, suku Bairru-Pite, postu adminitrativu Dom Aleixo, Minisípiu Dili.
Afeta husi inundasaun ne’ebe mosu iha sabadu kalan tuku 1 madrugada. imajen Egidio Nono.
Xefe Aldeia Moris ba Dame, informa tuir dadus ne’ebé autoridade rekolla totál uma kain ne’ebé afeta ba inundasaun sira hamutuk 12 uma kain lima grave no uma kain 7 afeta normal, maibé to’o agora seidauk hetan apoiu emerjénsia ruma husi governu
“Ha’u nia komunidade sira ne’e hamutuk uma kain 12 komostu husi uma kain 5 afeta grave, uma tohar, no sasan iha uma laran rai taka foti la di’ak, no uma kain 7 afeta normal hanesan bee tama uma laran, dezde hetan dezastre durante semana ida ona to’o ohin seidauk simu apoiu emerjénsia ruma,”dehan xefe aldeia, Moris ba Dame, ba Lafaek news, sesta (09/04/2021).
komunidade afetadu Amelia de Jesus Ribeiro, informa, durante inundasaun ne’ebé akontese iha semana kotuk liuba estraga sasan uma tahu taka metin, maibé to’o agora seidauk hetan apoiu tantu hahan no material husi governu.
“Durante ha’u nia uma bee sobu estraga ami nia sasan hanesan ropa osan no-mos uma monu, maibé to’o agora governu no ONG sira iha seidauk mai ajuda netik ha’u hanesan sidadaun ida,”dehan Vítima Amelia.
Dadus kona-ba komunidade afetadu hetan estragus mak ropa, sasan dapur, armariu no uma inklui sasan sira seluk ne’ebé iha uma laran la konsege salva, maibé autoriedade hato’o ona ba iha parte governu hodi fo apoiu ba vítima inundasaun iha aldeia refere.
Jornalista : Acacio Pinto/Egidio Nono
Editora : Nelya Barros
