Lautém-(Lafaek News)—Paisajen furak husi alto Laleno ne’ebe sikat iha suku tolu kompostu husi Mahina II, Baduro, no Serelau sai identíku iha postu administrativu Lautém, munisípiu Lautém, no atrai vizitante rai laran inklui estranjeiru, maibé governu la tau matan.
Izi Branco da Cruz, nu’udar komunidade ne’ebé hela besik area refere, haktuir fatin Laleno fatin ne’ebe furak no poténsia turizmu naural, maibé governu rasik seidauk tau matan hodi hadia no dezenvolvimentu infra-estrutura atu fasilita vizitante husi rai laran no rai liur.
Paisajen furak iha Alto Laleno postu administrativu Lautem. foto LN AM.
“Foho Alto Laleno ida ne’e kapas tebes iha ne’e ita bele hateke hetan ba tasi mane no ba parte tasi feto maibe ita governu rasik to agora seidauk tau matan ba ida ne’e fatin ne’e hau here’e poténsia mós ba area turizmu, maibé difikuldade ne’e boot ida ba ita mak estrada ne’ebe liga mai iha suku tolu ne’e aat tebes,”Izi Branco da Cruz ba Lafaek News, (09/02/2021)
Foho laleno mos la’os fo de’it nia furak ba rai Timor, maibé mos proteze mós eis FALINTIL sira iha tempu gerilla hasoru inimigu sira iha tempu resisténsia, maibé too ohin loron fatin istóriku ne’e governu seidauk tau atensaun oinsá hadia infraestrututra báziku liu-liu hadia Estrada oinsá bele dada ema ba vizita.
“Fatin ne’e ita nia FALINTIL sira barak mak subar iha ne’e tamba rai ida ne’e riku ho nia produto lokal ho ida ne’e sai sentru ba ita nia FALINTIL sira atu bele foti hahan sira hanesan nu’u, kulu, talas no seluk tan,” dehan Izi.
Jornalista : Anselmo Monteiro
Editora : Nelya Barros
