Lafaek News–Ministériu Interior realiza enkontru ho embaixada Austrália Wanda Sendzimir, aborda planu iha 2022, kona-ba implementasaun programa tráfiku humana ne’ebé sai mos asuntu prioridade iha mandatu oitavu governu konstitusional.
Vise Ministru Interior Antonio Armindo informa, governu fo ona kompeténsia ba Ministériu Justisa atu inísia programa tráfiku humana, maibé iha semana kotuk nia( V-MI) hetan kontaktu husi primeiru ministru katak ministeriu interior mós atu haree ba iha PNTL, protesaun Sivil no mós imigrasaun hodi haree hamutuk programa tráfiku humanu.
Janeiru 2022 ba oin, ita hahu implementa ona programa trafiku humanu, tanba agora ita sei prepara planu estratejia, planu implementasaun no mós planu sira seluk mak ita presiza prepara hafoin ita implementa,” dehan Vice MI Antonio Armindo ba jornalista iha nia kna’ar fatin Vila Verde Dili, Kuarta 11/11/2021.
Perante reuniaun ho embaixada Austrália, molok ne’e enkontru ona ho IOM atu bele kontribui apoiu ministériu atu haree hamutuk asuntu refere hodi aselera dimínui kestaun tráfiku humanu iha Timor-Leste.
Ita mós sei realiza treinamentu ba imigrasaun, PNTL no mós protesaun Sivil nune’e mós sei hasoru malu ho TLDP atu sira ajuda nafatin ita, tan ne’e ami halo ona ajenda, Segunda agora sei hasoru malu ho primeiru ministru atu lori ami nia konseitu ne’ebe ami prepara hela atu aprezenta,” nia relata.
Entretantu nia parte seidauk hatene detallu kona-ba kuantidade no tipu ida ne’ebe konsidera tráfiku humanu tanba buat barak mak akontese iha Timor-Leste, nune’e mós total orsamentu ne’ebe Vise ministru interior tau ona iha konseitu hamutu $.300.000.00.
Jornalista : Orlando Magno
Editor : Agapito de Deus
