Lafaek News–Ministru Prezidénsia no Konsellu Ministru (MPKM), Fidelis Manuel Leite Magalhães afirma governu sei kontinua asaun limpeza jerál ne’ebé sei hala’o husi funsionáriu orgaun no servisu administrasaun públiku sira iha nivél nasionál.
Inisiativa ne’ebé hahú ona iha semana kotuk, sei hala’o mós iha aban, loron 4 fulan fevereiru tinan 2022, durante loron tomak no sei realiza iha kada sexta-feira,”dehan MPKM Fidelis iha konferénsia imprensa iha Palasio Governu Dili, kinta (03/02/2022).
Governante ne’e akresenta, kampaña limpeza ida ne’e hanesan parte ida atu kombate surut denge ne’ebé hala’o ona husi kedas fulan dezembru 2021.
Tuir dadus horseik ne’ebé Ministériu Saúde fó sai, rejista ona totál kazu denge hamutuk rihun ida atus haat hitu (1407) no mate hamutuk ruanuluresin rua (22).
Dili mak munisipiu afetadu liu ho totál kazu hamutuk atus sia ruanuluresin lima (925),” informa MPKM Fidelis Magalhães.
Aleinde kuidadu sira ne’ebé adopta ba prevensaun denge nian, governu mós apela ba populasaun atu mantein vijilante ba medida preventiva sira husi COVID-19. Ministériu Saúde fó sai katak dadaun ne’e kazu ativu hamutuk ema nain atus sia neennuluresin walu (268), entre nùmeru ne’e ema nain atus rua neen nulu resin neen (266) iha Dili.
Jornalista : Juvita dos Santos
Editor : Agapito de Deus
