Lautém-(Lafaek News)—Governu liu husi funsaun publika hasai desizaun númeru 3958/2020/PCFP, ofisialmente ezonera ona administradór postu administrativu Lautem Sesante, Francisco dos Santos, no nomea hikas Luis Morais simu kedan pose iha kinta ohin (14/01/21) durante fulan 6 ba oin.
Enkuantu remata simu kna’ar administradór postu administrativu Lautém , Luis Morais hateten simu kna’ar foun hanesan responsavel boot, planu prioridade sei haree liu ba Covid 19 ne’ebé afeita mai too iha postu administrativu ne’e.
“Liga ba asuntu covid 19 nian iha ona osan 20 mill ne’ebé aloka ona mai Munisípiu sei liu ba postu administrativu sira tanba ne’e sei hare didiak planu prioridade ne’e hodi konbate covide 19 iha postu ba to suku no aldeia sira, planu prioridade seluk sei kontinua servisu ho programa dezenvolvimentu suku ka PNDS Atu hare liu ba suku sira iha postu administrativu ne’e,” katak imposadu iha remata serimónia tomada de pose iha kinta semana ne’e iha Lautém.
Sorin seluk administradór Sesante postu administrativu Lautem Fransisco dos Santos, katak nia prontu simu desizaun ne’ebé iha maibé nia la hetan erru ruma iha karta ezonerasaun ne’e, maibé hanesan subordináriu prontu nafatin halo tuir saida mak mai husi governu.
Eis administradór mós fo agradesimentu boot obrigadu ba xefe suku hotu iha postu administrativu Lautém ne’ebé durante ne’e servisu hamutuk ona ho nia.
Observasaun lafaek news iha serimónia toma de pose ne’e partisipa direita husi administradór munisípiu Lautém Domingos Savio, sesretáriu munisipiu, Oscar Dias Quintas no funsionáriu kargu xefia sira iha munisípiu refere.
Jornalista : Elidio Castro
Editora : Nelya Barros
