Lafaek News— Governu liu husi reuniaun Konsellu Ministru, kinta (08/04/2021), deside aumenta tan serka Sanitária iha munisipiu rua Baukau no Vikeke ba loron hitu (7) no suspende komfinamentu obrigatóriu.
“Ohin mos konsellu ministru aprova mos rezolusaun governu nian atu nafatin mantein impozisaun serka Sanitária iha munisipiu Baukau ho Vikeke ba loron hitu tan.” Dehan MPKM Fidelis Leite Magalhães hafoin remata reuniaun KM iha palasiu Governu, kinta semana ne’e.
Nia fundamenta munispiu Baukau ho Vikeke sei nafatin aplika serka Sanitária, maibé komfinamentu obrigatóriu rua refere suspende hotu, maibé ida ne’e la presija halo rezolusaun ketak.
“Rezoluasaun ne’e iha munisípiu rua Baukau no Vikeke aban kaduka komu nia la kaduka nia renova de’it, maibé serka sanitária mantein nafatin ne’ebé baukau no vikeke atu sai ba munispiu seluk mos tenki halo teste swab.”esplika subliña.
Tuir dadus jeral husi munisipiu Baukau hatudu hushi loron 7-8 fulan abril tinan ne’e rejista kazu positivu covid-19 na’in 5 no total kazu positivu iha Baukau hamutuk ema na’in 34, pozitivu covid-19 husi cluster 11.
Husi cluster 11 ne’e mak hanesan Suku Tirilolo aldeia Lutumutu rejista kazu na’in 5, aldeia kaiubilale kazu 2,aldeia Afagua Wailili kazu 3, aldeia Casmutu suku Buruma na’in 1,aldeia Lamegua suku Bahú kazu 2, aldeia Bulai suku Buibau kazu 14, suku Darawai kazu 1, suku Watuhako Venilale kazu 1, Suku Soba Laga, kazu 1 no suku Letemum postu administrativu Kuelikai kazu 2.
Husi kazu foun pozitivu hirak ne’e maioria sidadaun sira hala’o viajen husi Díli durante implementasaun serka Sanitária, tan ne’e husu ba sidadaun hotu atu mantein regras organizasaun saúde mundial no ministériu saúde nian hodi bele prevene an husi surtu covid-19.
Kontributór : Javelino Silva
Editora : Nelya Barros
