Lafaek News—Ministru Prezidénsia no Konsellu Ministru Fidelis Manuel Leite Magalhães apela populasaun sira atu mantein kalma no labele pániku, governu sei esforsu asegura no garantia preokupasaun rua hanesan bem estar familiars no garantia povu labele hetan sofrementu ba moras covid-19.
“Ita kompara ho tinan ida kotuk ita bele dehan katak nivel de alerta ne’e aas liu tanba númeru transmisaun hirak ne’ebé akontese iha ita nia rai laran iha momentu ida ne’e, mezmu ida ne’e tinan tomak ita aprende ona kona-ba natureza virus ne’e rasik no ita mós preparadu ona kompara ho virus ne’e hahú, tan ne’e husu nafatin komunidade atu kolabora di’ak no tau konfiansa ba autoridade sira, militar sira no pesoál saude sira atu nune’e, kontribui atu moras ida ne’e labele hadaet liután iha ita nia rai,” MPKM Fidelis Magalhães, ba jornalista sira hafoin remata enkontru KM iha Auditóriu Finansas Aitarak Laran Dili, Kuarta (10/03/21).
Fidelis husu atu populasaun hotu pasiénsia tanba situasaun ida ne’e halo ema hotu sente la halo buat hotu, maibé ida ne’e hanesan sakrífisiu boot ida atu luta hodi manan vitória hasoru moras ida ne’ebé sai ameasa la’os de’it iha Timor Leste, más iha mundu tomak afeta roda ekonómiku prozesaun dezenvolvimentu no bem estar sira.
“Ne’eduni graças adeus ita sei hotu sei moris, maski ita hotu hatene katak risku ida ne’e real no ezije ita hotu atu kontribui servisu hamutuk, se governu de’it labele, autoridade de’it labele, ita só manan se sidadaun hotu iha konsiénsia servisu hamutuk, ita hotu preokupa malu hodi moras ne’e labele da’et ba malu nune’e de’it mak ita sei bele hanesan nasaun,” hakotu nia.
Jornalista : Juvita dos Santos
Editora : Nelya Barros
