Lafaek News— Governu liu husi reuniaun Konsellu Ministru ohin kuarta feira, (10/03/21), deside atu delibera ona impozisaun serka sanitária iha munisípiu Kovalima, eseptu ba postu-administrativu Fatumea kontinua mantein.
Ministru Prezidénsia no Konsellu Ministru (MPKM), Fidelis Manuel Leite Magalhães, informa serka sanitária iha munisípiu Kovalima hotu ona, eseptu postu-administrativu Fatumea sei mantein nafatin to’o loron 21 fulan marsu.
“Servisu sira hotu ne’ebé relasiona ho atividade administrasaun públiku no atividade eskola nian sei tuir nafatin despaxu husi Ministériu Estatal no Ministéru Edukasaun to’o loron 13 fulan ne’e,” afirma Fidelis Magalhães hafoin remata enkontru KM iha sala Auditóriu Finansas Aitarak laran Dili, kuarta semana ne’e.
Governante ne’e relata, serka sanitária hotu ona eseptu Postu-administrativu Fatumea, signifika kontinua aumenta, tanba moras pandemia covid-19, kontinua eziste, tan ne’e esforsu atu buka tuir moras ne’e nia hun, se mak lori moras ne’e mai hodi hada’et.
Enkuantu Serka Sanitária iha Munisípiu Dili sei kontinua nafatin no transporte públiku sira sei la halo movimentu, atu movimentu sai husi Dili mós labele no tama mós labele, só bele de’it ba pesoál sira ne’ebé hetan autorizasaun atu hala’o atividade ho karakter urjente hanesan lori ema moras, lori hahán fornese ba seguransa.
Jornalista : Juvita dos Santos
Asisten Editór : Pedro de Almeida