Bobonaru-(Lafaek News)–Grupu Feto Permakultura Balibo Belola (GFPBB), produz ona ai-marungi sai hanesan materia prima ida halo produsaun ba ai-moruk tradisionál atu bele kura moras oin-oin.
Leopoldina nu’udar Koordenadora grupu FPBB, haktuir grupu refere hari’i iha loron 15 fulan Juñu 2019 no lokaliza iha aldeia Belola, postu-administrativu Balibo, munisípiu Bobonaru no akumula traballadór na’in 6 kompostu husi feto 5 no mane 1, durante ezisténsia grupu refere konsege hala’o atividade hanesan kuda marungi metade ektares.
“Ami mós konsege halo produsaun ba ai-moruk tradisionál sira liu husi materia prima ne’ebè mak antes ne’e ami iha ona hanesan marungi ne’ebè mak ami kuda iha to’os-laran, ai-moruk tradisionál ne’ebè ami produs ne’e bele kura ba moras oin-oin hanesan; halakon ran-midar, kontra kanker ka tumor no seluk tan”,dehan Leopoldina ba lafaek news iha nia kna’ar fatin aldeia Belola, kuarta (26/11/2020).
Tuir nia, da-daun ne’e produtu ne’ebé grupu ne’e produz fan ona iha fatin tolu mak hanesan Maliana, Belola no Díli, no grupu ne’e mós hanoin hakarak hakiak tan animal hanesan manu no fahi.
“Produtu tradisionál ne’ebè ami fa’an iha merkadu ne’e kada plástiku 500 gramas ho folin $1.50 no reseitas ne’ebè ami hetan husi fa’an produtu refere totál $200.00, tuir planu ami mós sei jere osan refere hodi sosa fali ba manu no fahi atu nune’e ami bele haki’ak,” dehan nia.
Iha biban hanesan nia husu ba feto maluk hotu atu labele baruk no nafatin badinas hodi nune’e bele dezenvolve di’ak liután nasaun doben ida ne’e ba oin.
Jornalista : Princess Silva
Editora : Nelya Barros
