Lafaek News—Porta Voz Grupu Estudantil Munisípiu Lautem (GEML), Vidaligia de Jesus Sanches, liu husi kompriensa imprensa hetete, hamutuk ho estrutura fó apoiu tomak ba Prezidente da Repúblika Francisco Guterres “Lú-Olo atu kontinua re-kandidatu ba presidente Repúblika iha periodu 2022-2027.
“Ami nu’udar Grupu Estudantil hosi Munisípiu Lautem hakarak hamriik hodi espresa demokrátikamente ami-nia preferénsia ba kandidatura iha eleisaun prezidensiál tuir mai ami hakarak husu ba Dr. Francisco Guteres, Lú Olo, atuál Prezidente Repúblika atu re-kandidata nia-an ba eleisaun prezidensiál periódu 2022-2027,” dehan Portavos Estudantil Lautem Vidaligia de Jesus Sanche, ba jornalista sira liu husi konferensia Imprensa, iha Jardim 5 de Maiu, Kuarta, (7/07/2021).
Porta voz ne’e fundamenta, úniku atual Prezidente Repúblika Francisco Guteres, Lú-Olo, maka firme ho nia pozisaun nu’ udar aman nasaun nian hodi hatudu kapasidade lideransa ba povu ne’ebé nia hadomi tebes, tanba Prezidente Lú Olo ema ida ne’ebé hatudu nia konsisténsia no komitmentu iha palku-politika nomós hatudu domin forte ba nia pátria no povu, no halo tuir duni konstituisaun haruka.
“Ami mós alerta ba estudante no juventude Munisípiu Lautem hotu-hotu atu fó apoiu ba ita-nia aman Dr. Lu-Olo hodi kandidata nia-an no alkansa vitória povu Maubere tomak nian tanba durante ne’e Dr Lú Olo halo tuir de’it konstituisaun RDTL no la hakru’uk ba lider politiku ruma,” Porta voz informa.
Nune’e mós Grupu Estudantil Munisípiu Lautem husu ba atual Prezidente Republika Francisco Guteres “Lú Olo” , atu laran-luak hodi re-kandidata an ba Prezidente RDTL periodu 2022-2027.
“Tanba ami povu tau esperansa ba ita-boot, Francisco Guteres, Lú Olo, hodi hatu’ur loloos konstituisaun RDTL no justisa sosiál ba ema hotu tanba ita-boot mak sai Prezidente Repúblika ema hotu nian no ba povu tomak,” nia hakotu.
Jornalista : Joni Mau Risa.
Asisten Editór : Pedro de Almeida
