Lafaek News—Lourenço Felix Soares, optimista fa’an ai-maran sei garante oan nia future hodi kontribui ba dezenvolvimentu nasaun dobben Timor Leste.
Lourenço Felix Soares idade 50 hela iha suku Kamea Postu Administrativu Kristu-Rei, munisípiu Dili, moris ho fa’an ai-maran, loron-loron tesi ai maten ne’ebé namtate iha rai leten kesi halo futun leba tun ba sidade buka osan selu oan sira nia eskola no sustenta mós nesesidade uma laran.
“Ha’u nia oan feto bo’ot tamat ona SMA foin da-daun 2020 ne’e, maibé hakarak kontinua ba universidade, maibé ekonomia uma laran la to’o, agora ha’u hanoin atu haruka ha’u nia oan feto ne’e ba universidade mós laran todan tebes, tanba universidade selu karun, depois ha’u buka moris liu husi faan ai-maran de’it, hira mak selu oan eskola hira mak sosa hahán,”dehan Lourenço Felix soares, ba jornalista lafaeknews foin lalais ne’e iha nia hela fatin suku Kamea.
Bainhira entrevista ho jornalista Lafaek News, Lourenço haktuir nia iha oan hamutuk na’in 9, oan feto dahuluk remata ona eskola iha nivel sekundária, na’in rua sei eskola hela iha ensinu sekundária, no na’in tolu sei foin tama ona ensinu primaria inklui oan na’in sei eskola tanba tinan sei kiik.
Idade 50 ne’e mós esplika, hahú husi okupasaun Indonézia nian too ohin fa’an de’it ai-maran hodi sustenta nesesidade uma laran, Lourenço hetan moras TBC iha tempu ne’eba bainhira nia servisu iha fatin balu la lembra ona, ho ida ne’e sai tiha husi servisu ne’e hodi tratamentu ba nia moras ne’e too di’ak buka ai-maran leba tuun mai sidade hodi buka osan.
Tuir nia rendimentu husi ai-maran ne’e loron ida lori ba sidade Dili ema sosa too dolar 15, sorte di’ak too dolar 20, maibé tenke ho pasiénsia, see karik ema la sosa lori fila ba uma hodi kontinua fa’an fali iha loron tuir mai.
“Osan ne’ebé ha’u hetan importante sosa hahán uma laran no selu oan sira nia eskola, ha’u garante oan sira sei eskola hotu, ha’u bele fa’an ai-maran, maibé aban bainrua ha’u nia oan sira tenke matenek hodi kontribui netik ba nasaun ida ne’e,” nia hakotu.
Jornalista : Etelvina Sarmento
Asisténsia Editór :Egidio Nono
