Lautém-(Lafaek News)—Administradór postu administrativu Tutuala, munisípiu Lautém, Carlito Pereira, utiliza karreta estadu kondisaun laiha bak kotuk hodi halo servisu servi povu.
Karreta estadu ne’e governu fó iha tinan 2015, kondisaun hahu grave iha 2021, tanba hasoru dezastre iha tinan rua ba kotuk rezulta karreta nia bak kotuk aat hotu, iha ne’ebe too ohin loron seidauk hadia.
“Ha’u pasiensia tenke uza karreta sem iha bak tanba bak aat ona rai udan ha’u tenke utuliza,” dehan administradór postu Tutuala munisípiu Lautem, Carlito Pereira ba Lafaek News iha Lospalos, segunda (08/02/21).
Tuir administradór postu ne’e katak, Kareta refere kondisaun aat tanba soke iha tinan rua ba kotuk, rezulta karreta ne’e nia bak kotuk aat hotu no la konsege manutensaun hodi utiliza obrigatóriu too ohin loron.
“Kareta nia bak aat no ba body tomak ne’e mak afeta mós ba instalasaun ahi sira ne’e, afeta aat mós mangeira ida liga oli travaun nian no ba mina, entaun ha’u hasai tia ninia bak hodi labele estraga totál karreta ne’e, tanba oli travaun ha’u labele enxe ona ha’u buka meius hodi hasai tiha bak kareta ne’e maske kondisaun hanesan ne’e ha’u utulija hodi halo dadaun servisu,” katak administradór husi postu Tutuala ne’e.
Carlito Pereira hateten, maske kondiaaun karreta ne’e la favorese ona atu utiliza halo servisu, maibé laiha transporte atu lori nia husi Tutuala ba munisípiu Lautém, tan ne’e nia uza obrigatóriu hodi halo servisu administradór postu nian.
“Tuir loloos karreta ne’e halo reparasaun ona la’ós manutensaun ona maibé osan seidauk iha ha’u hato’o ona relatóriu mai iha diresaun maibé seidauk iha resposta hodi hadia fali karreta ne’e,” nia argumenta.
Entretantu, liga ba preukupasaun ne’e administradór munisípiu Lautém Domingos Savio, simu ona relatóriu kona-ba kondisaun karreta ne’e no sei submete ba nasionál hodi tau iha priroidade orsamentu manutensaun 2021.
Jornalista : CE. Lautém
Editora : Nelya Barros
