Lafaek News—Akontesimentu funu ba libertasaun nasional Timor Leste, hafoin hili referendum iha 1999, hetok situasaun manas liután, nune’e Justina Ximenes deside lori nia oan Marciana Ximenes sira rekoa ba ailaran atu bele hetan abrigu no salva an husi inimigu nia liman kroat, bainhira fila husi abrigu Marciana sente kedan isin manas too sai defisiensia too ohin loron.
Justina Ximenes hanesan inan ba defisiente Marciana Ximenes haktuir, defisiensia Marciana moris iha loron 23 fulan Marsu 1999, kompleta ona idade 23, moris kedan iha situasaun ne’ebé manas husi pro integrasaun Indonésia nian, familia refere traumatiku maske Marciana sei bebe tenke buka fatin seguru hodi subar-an.
“ Ha’u nia oan ne’e moris iha 1999, nia moras ne’e kona bainhira ami halai ba ai laran, depois ita tama fali mai nia hetan isin manas makas nia istika- an too agora nia sei nafatin hanesan ne’e, nia la hatene ko’alia no la’o mós la hatene nia moris mai fulan sanulu resin ida komesa la’o nei-neik ona maibé hetan moras ida ne’e mak nia la’o la di’ak no toba de’it iha fatin,” Inan defisiente Justina Ximenes ba jornalista sira bainhira iha media TOR iha Lore 1 munisípiu Lautém, sabadu (31/05/2024)
Inan husi defisiénsia Marciana Ximenes haktuir, kona-ba oan feto ne’e nia moris, sempre lori ba sentru saúde Lospalos vila hodi tratamentu ba saúde durante fulan hitu maibé laiha mundansa, nune’e familia defisiente deside lori fila ba uma hodi buka ai-moruk tradisionál no klínika maibé nafatin laiha mudansa to’o ohin.
“Ami ba duni hospital kuaze fulan 7 resin sira sona, sona no sona maibé ami haree laiha mudansa osan mós laiha mak ami labele selu ona entaun ami deside fila ba uma, iha hospital laran mós nia sona nafatin maibé nafatin labele book an la book an liman ain tos nafatin entaun ami fila to agora ami atende nia tinan rua nulu resin tolu 23 ona doutor sira deteta katak nia hetan moras malaria ne’ebé sa’e ba nia ulun ikus mai nia hetan moras ida hanesan ne’e,” nia dehan
Justina Ximenes nudar inan husi defisiensia Ximenes, foto LN Aniceto Dias
Justina Ximenes, haktuir husi parte autoridade lokál husu ona ba defisiente Marciana nia dokumentus hanesan kartaun eleitoral no Bilete de identidade, maibé ho kondisaun ne’ebé grave labele lori ba STAE ho notariadu hodi halo trata dokumentu.
“Sira mai duni iha ne’e maibé sira haruka ami halo nia BI halo nia eleitoral agora ami nia razaun agora nia labele hanesan ne’e nia bot ona ami labele kous nia bá iha halo nia tratamentu nia dokumentus, entaun ami deside husik nia la hetan buat ruma la iha buat ida,” inan defisiensia ne’e sublina.
Inan ba defisiensia ne’e husu IX Governu liu husi Ministériu Solidariedade Sosiál no Inkluzaun (MSSI), atu fo apoiu fasilidade ba defisiente Marciana Ximenes ne’ebé ho tinan 23, tanba durante ne’e parte governu seidauk haree ba preokupasaun defisiente nian iha Aldeia Vailana Suku Loré 1, Postu Administrativu Lore, Munisípiu Lautém.
Iha sorin seluk, aman defisiénsia Marciana, Carlos Fernandes, hatutan katak kondisaun Marciana, nudar aman senti triste bainhira haree oan nia kondisaun hanesan ne’e, maibé simu ho liman rua nafatin kontente ho nia, fo haan no hemu bainhira maromak nia planu hodi bolu nia.
“Ba ida ne’e ha’u hanesan aman hau labele tolak ninia kondisaun ida hanesan ne’e katak ha’u fo han ba nia loron kalan toba ha’u labele hanoin ida ne’e ha’u labele ko’alia ida ne’e sé bainhira ha’u hanoin at ba nia mak mate ne’e Maromak fo sala ba ha’u bele kastigu ha’u” dehan Carlos Fernandes
Xefe Aldeia Vailana, sukus Lore 1, Joaquim Ximenes
Hatan ba preukupasaun husi inan-aman defisiénsia, Xefe Aldeia Vailana, Joaquim Ximenes, hatun lia katak, defisiente iha aldeia Vailana seidauk identifika hotu, maibé defisiente Marciana Ximenes nian parte autoridade lokál fo hatene ona ba governu dezde VIII governu, maibé seidauk iha resposta ba preokupasaun ne’ebé parte autoridade lokál hato’o liu-liu ba defisiente fíziku nian to’o IX Governu nafatin laiha resposta.
“Komesa oitavu governu to mai iha nonu governu iha oitavu governu defisiensia ohin ita ba dala uluk ne’e ne’e seidauk iha ajuda ne’e seidauk ajuda no fo saida mós la iha nia família ne’e husu bebeik ba ha’u mais ha’u dehan hanesan ne’e ita hein de’it ami husu ona be ita boot sira iha leten mais bainhira maka fo ajuda mai ita ne’e ita hein de’it” dehan Sefe aldeia vailana
Autoridade lokál salienta katak defisiente nia dokumentus kartaun eleitoral iha ona maibé Kartaun Bilete de identidade (BI) seidauk iha, ne’ebé parte husi Ministériu Solidariedade Sosiál no Inkluzaun (MSSI), husu defisiente nia Bilete de identidade (BI), maibé kondisaun defisiente fíziku hodi labele hamrik no la’o tanba de’it iha fatin.
“Defisiensia ninia eleitoral iha ona mais ninia BI maka seidauk iha mak sira leten ne’e husu ninia BI nia BI maka iha hotu mais defisiensia hanesan ne’e nia labele hamrik nia labele tur ne’e maka araska oituan ne’e ohin ninia apa rasik ne’e dehan hanesan ne’e ema hanesan ne’e hamrik mós la hatene tur mós la hatene oinsá maka ita hasai ninia BI eleitoral iha ona mais BI mak seidauk iha”
Alende ida ne’e autoridade lokal identifika ba dadus defisiente fíziku, matan no tilun iha aldeia Vailana hamutuk Tolu (3) maibé autoridade sei buka tuir no kobre komunidade hotu atu buka dadus kompleta.
Programa TOR kobertura ba tinan ne’e iha munisípiu Lautém postu administrativu Loré, hetan apoiu husi Assosiasaun Jornalista no OXFAM Timor Leste hodi mobiliza jornalista husi media nasional sira tuun direta ba baze hodi identifika difikuldade povu kiik iha area remotas.
Jornalista : Aniceto Dias
Editor : Agapito de Deus
