Lafaek News—Forum Organizasaun Noun-Governamentál Timor Leste (FONGTL), konsidera PNTL munisípiu Bobonaro hala’o atuasaun kontra Konstitusaun Artigu 147 alinea 1, no lei organiku PNTL nian dekretu lei n° 16/2009 loron 18 fulan Marsu Lei organiku PNTL artigu 1 alinea 1.
Asuntu ne’e, hatoo husi ofisial advokasia FONGTIL, Jorge Madeira, liu husi konferénsia imprensa, sesta (13/01/2023), iha edefisiu FONGTIL Kaikoli, atu husu parte relevantes sira hanesan autoridade seguransa hotu kompostu husi PNTL ho F-FDTL sira labele halo tuir de’it sira nia hakarak.
“Ami konsidera komandu PNTL Munisípiu Bobonaru kontra Konstitusaun artigu 147 alinea 1 ne’ebe hateten polísia defende legalidade demokrátika no garante sidadaun sira nia seguransa interna, maibé ami nota katak komandu Munisípiu halo agresaun fisiku ba sidadaun sivil iha Bobonaru no la obedese ba orden konstitusionál inklui lei orgániku PNTL nia dekretu lei n° 16/2009 fulan Marsu lei orgániku PNTL, la’ós halo fali asaun agresaun fíziku ba komunidade sivil sira ne’ebe iha terenu sira ninia atuasaun ne’e ba kaer ema mais labele halo agresaun fisiku,” afisial advokasia Fontil, Jorge Madeira iha kaikoli Dili, sesta (13/01/2023)
FONGTIL mos konsidera atuasaun FALINTIL-Forsa Defeza Timor Leste (F-FDTL) ne’ebé destakdu iha munisípiu Kovalima kontra konstitusaun artigu 146, atu garantia independénsia nasionál, integridade territóriu, liberdade no populasaun nia seguransa hasoru agresaun ruma no ameansa esterna ne’ebé akontese iha Suai Loro.
“Ami konsidera atuasaun falintil forsa defeza Timor Leste iha Munisípiu covalima ne’ebe kontra Konstituisaun artigu 146 alinea, garantia independensia nasionál, integridade territórial liberdade no populasaun nia seguransa hasoru agresaun ruma ka ameasa esterna ho respeitu ba orden konstitusionál La’ós halo fali agresaun fisiku ba sidadaun sira no komunidade sira hanesan semana kotuk baku komunidade ida iha saui loro,” Portavos sosiedade sivil ne’e.
Jornalista : Aniceto Dias
Editor : Agapito de Deus
