Lafaek News—Forum Organizasaun Naun-Governamental iha Timor Leste (FONGTIL) deklara apoiu governu hodi hadia povu nia moris iha orsamentu jeral estadu (OJE) 2022 ho tetu orsamentu fiscal US$1.5 billões.
“Sosiedade sivil deklara apoiu tomak ba inisitiva governu nian hodi hadia povu nia moris liu husi orsamentu estadu 2022 no sei mobiliza mós apoiu husi komunidade Timor Leste no komunidade internasional ba polítika brillante governu Timor-Leste,” hatete Diretur Ezekutivu FONGTIL Daniel Santos do Carmo, liu husi kompriensa imprensa iha kaikoli, kinta (8/07/2021).
Nia relata, iha Jornada orsamental ba orsamentu Jeral Estadu 2022 nian ho tetu orsamentu fiscal US$1.5 billões defini ona programa prioritários (6) mak; Kapital sosial (edukasaun, formasaun profissional no saude), Abitasaun no inklusaun sosial, Seitor produtivus (agrikultura, turismu, ambiente no konektividade), Desenvolvimentu seitor privadu, Desenvolvimento rural no mós Governasaun.
Ho ida ne’e sosiedade sivil apresia tebes ba sinsieridade governu nian ne’ebé mai duni ho fundamentu kapasidade iha análise konteistual no análise situasaun Timor-Leste nian ne’ebé bele identifika seitores prioritarius ne’ebé aserta duni ba nesessidades no desafiu povu no ba sustentabilidade Timor Leste nu’udar estadu.
Entertantu, sosiedade sivil kompostu husi FONGTIL, Rede Coalition for Education (TLCE), Core group Transparancy (CGT), PN BESI.TL, Rede Feto Timor-Leste, sei halo sosializasaun maka’as liu tan no halo konsiensializasaun ba komunidade atu bele simu vassina hodi kria kondisoens ba governu atu bele servisu di’ak liu tan iha implementasaun programa prioritarius sira.
Jornalista : Etelvina Sarmento
Asisten Editór : Pedro de Almeida
