Lafaek News–Organizasaun Noun Governamental (ONG), FOKUPERS durante ezijténsia tinan bala dala-25 iha rezultadu servisu rejista kazu ho tipu maioria violénsia doméstika.
Kestaun ne’e hato’o husi Diretora Ezekutivu Fokupers Maria Fátima Pereira Guterres hafoin remata enkontru semanal ho Prezidente Repúblika José Ramos Horta, tersa (28/06/2022) iha Palásiu Prezidensiál bairo-pite.
Kazu sira ne’ebé tama iha Fokupers iha tinan 2020 konsege resista kazu besik atus tolu resin (305), iha 2021 hamutuk kazu rihun rua resin (204), iha tinan 2022 iha fulan janeiru too maio hamutuk kazu 59, kazu sira ne’e kontinua lori ba iha prosesu legal sira”, esplika Diretora Ezekutivu Fokupers ne’e.
Diretora ezekutivu Fokupers afirma, Vitima sira Fokupers nafatin fo asisténsia, kestaun advokasia konsege halo iha ministeriu relevante sira, Fokupers kontinua halo servisu ho Ministeriu relevante sira hanesan ministeriu edukasaun hodi haforsa liu tan polítika fila hikas ba eskola ba vitima sira ne’ebé mak para eskola tanba kazu violensia seksuál ho insestu.
Nia dehan, tan ne’e iha loron 15 fulan Jullu sei realiza aniversáriu Fokupers nian ba dala 25, kazu sira ne’ebe boot liu husi kazu violénsia bazeia ba jéneru hanesan Violénsia Doméstika, insestu, seksuál, Husi kazu hirak ne’e, kazu ne’ebé porsentu as liu kazu Violénsia Doméstika, tuir kedan kazu abandona, Violénsia seksuál no kazu insestu.
Too iha momentu ida ne’e susar tebes ba iha eskola sira atu simu fali Vitima sira ne’ebé sai Vitima bazeia ba jéneru, nune’e ami nafatin halo parseira di’ak ba ministeriu edukasaun no ministeriu sira seluk nune’e bele responde ba situasaun ne’ebé mak iha”, hatete Diretora ezekuzivu FOKUPERS Maria.
Jestora FOKUEPRS ne’e katak, kazu violénsia Domestika (VD) kontinua sae, tanba iha kestaun rua ne’ebé presiza konsidera, ida tanba ema hatene ona ema nia direitu keixa aumenta sae, entaun númeru aumenta tan, ida seluk depende mos ba iha ema ida-idak nia konsiénsia, tanba kazu hirak ne’ebe iha, la’os de’it akontese ba sira ne’ebé edukasaun ki’ik, maibé ba mos ema ne’ebé nivel edukasaun as no ekonómia di’ak.
Iha enkontru semanal ne’e Prezidente Repúblika rekomenda ba organizasaun ne’ebé servisu iha asuntu hapara violénsia bazeia ba jéneru, tantu iha parte prevensaun no protesaun, inklui asesu ba justisa kontinua hala’o misaun servisu di’ak, tanba servisu sira ne’e la’os ema hotu-hotu bele halo.
Jornalista : Rita Moniz
Editór : Agapito de Deus
