Lafaek News–Defisiénsia Feliciana Barboja idade 33, orijen husi aldeia Airaka-Lau, suku Aitutu postu administrativu Maubisse, munisípiu Ainaru, lori osan defisiénsia nian halo negósiu iha entrada area Kristu-Rei hodi sustenta nesesidade iha uma laran no oan nain rua nia futuru.
Feliciana mai hela iha Dili iha tinan 2007- too ohin no sofre defisiénsia iha ain tur parte los dezde klosan, maibé la tauk moras no terus, luta hasoru kiak liu husi negósiu kiik helik an iha ai mahon entrada area Kristu-Rei, komesa iha dadersan to’o rai nakaras hafoin bele fila ba uma nune’e atu kontinua iha loron aban.
“Iha dadeer rai nakaras ha’u sai husi uma Bidau no fan iha fatin ne’e no ha’u hahu fan iha tinan 2018, fatin ne’e ema sosa barak iha loron sábadu-Domingu, loron baibain ema laiha, fan iha loron domingo hetan dollares tolu-nulu, karik iha sabadu no loron baibain hetan $.15, maibé loron baibain dala ruma hetan $.5 sorte di’ak too $.10’’ hateten difisiénsia Feliciana ba jornalista Lafaek News iha Kristu-Rei foin lalais ne’e.
Rezidénsia atual iha aldeia Manu-Mata suku Bidau Santana postu Kristu-Rei munisípiu Dilí, difisiensia Feliciana maske hasoru susar, maibé hanesan feto ida nafatin iha forsa hodi hasoru susar no terus ne’ebe moris.
“Ha’u mesak maka buka osan hodi sustenta ami nia uma laran,’’ hateten nia.
Maske ho negósiu ne’ebé kiik, maibé atu bele suporta nafatin nia familia liu-liu sosa nesesidades loron-loron no haree oan nain rua, tanba nia kaben la servisu ona no hemu loron kalan iha uma de’it no la hare nia oan nain rua.
“ Osan sira ne’ebé maka ha’u fila liman ne’e husi osan difisiensia nian ne’ebé governu fó dollares amerikano atus ida walu-nulo ($180), maibé la’os fulan ida to’o fulan 6 hafoin foti dala ida,”Nia deklara.
Dala ruma nia sente moras iha nia ain, más ho hamnasa no domin la tauk ba susar no terus ne’ebé nia hasoru nafatin iha vontade hodi haree ba oan mane ki’ikoan nain rua.
“Ha’u iha forsa nafatin hodi buka osan ba labarik nain rua ne’e se karik laiha forsa sé maka tau matan ba labarik nain rua ne’e tamba nia apa lanu hela deit no lahare sira nain rua ,” nia hakotu.
Jornalista : Manuel andrade
Editór : Agapito De deus
