Lafaek News—Inan faluk Palmira Guterres, hatoo ona kazu rai Bedik-Besidada Hera ba Ministériu Públiku ho razaun abitante balun faan inan faluk nia toos ne’ebé aluga dezde 1985 too ohin loron la konsidera toos nain.
Faluk Palmira Guterres hatoo keixa ba Ministériu Públiku munisípiu Dili númeru registu ex. 2804/23, iha loron tersa 03/10/2023, iha oras tuku 8 : 30, hodi hein xamada tuir mai.
“ Ha’u hatoo ona ba Ministériu Públiku, tanba sira faan ha’u nia toos ne’ebé sustenta ha’u nia moris loron-kalan, la konsidera ha’u, ha’u rona dehan sira faan dala tolu ona, maibé ha’u rasik la hatene,” inan faluk Palmira ba Lafaek News iha nia rezidénsia Hera, domingu (08/2023).
Faluk ne’e mos haktuir, nia hela iha rai ne’e dezde kedan 1985 too ohin loron seidauk fan rai pedasuk ida, maske ema barak mai husu atu sosa, maibé faluk deside lakohi fan tanba ho razaun rai nain ne’ebé entrega toos ne’e ba faluk Palmira katak rai ne’e bele hela, maibé labele faan.
“Ikus fali mai ha’u rona, rai ne’ebé ha’u haruka sira mai hela ne’e, sira fahe tun sa’e hanesan sira mak nain fali, no bainhira ha’u ezije sira no husu se mak fan ha’u nia toos ne’e ? maibé sira rasik mos la hatene afinal sira simu hela rekonpensasaun,” haktuir faluk Palmira Guterres.
Inan faluk Palmira sente triste liután, ema sira ne’ebé sosa rai ne’e loke dalan ba toos laran la ho konsiderasaun ba faluk Palmira hanesan toos nain, ikus mai animal tama estraga ai-horis no modo tahan hirak ne’ebé faluk ne’e kuda iha nia toos laran.
“ Ema husik karau mai han hotu ha’u nia modo iha toos laran ne’ebé foin kuda, ema la hanoin ha’u ferik servisu todan,” Faluk Palmira.
Ikus liu, ina faluk ne’e husu parte kompeténsia atu haree didi’ak kazu rai Bedik Besidada ne’ebé fan tiha ona dala tolu, maibé nia rasik ne’ebé halo toos iha rai ne’e la hatene.
Jornalista : Mateus F. de Deus
Editor : Agapito de Deus
