Lafaek News–Anaberta Soares idade 48 husi aldeia Uaicana suku Bado-Ho’o, postu administrativu Venilale munisípiu Baucau, ne’ebé mak husik malu ho nia laen, bainhira oan feto ida hala’o sei hala’o hela estudu iha fakuldade ekonomia, departamentu akuntabilidade iha Universidade da Paz.
Inan faluk ne’e esforsu rasik buka osan liu husi sosa produtu local hanesan koto nurak, derok masin, liis mutin ho duut morin no kulu nune’e fan tutan hodi bele hetan rendimentu natoon ba sustentabilidade nesesidade uma laran no selu nia oan ninia eskola ne’ebé iha Universidade da Paz.
“Osan ne’ebé mak ha’u hetan ne’e hodi selu ha’u nia oan nia eskola no nia presiza loron-loron ,lukru kada loron ida ha’u hetan US 80 dollar dalaruma la to’o no osan ne’e balun ha’u tabun , karik iha lia ruma ha’u hodi la’o ho no familia balun presiza ha’u ajuda.”Katak Anaberta ba jornalista iha merkadu Taibessi , Sesta (09/09/2022).
Faluk ne’e dehan, nia kaben husik ona nia ho oan feto ida ne’ebé da-daun estudu hela iha UNPAZ, nune’e tenke esforsu buka moris fan haknauk produtu lokál hodi hetan netik osan rahun uituan bele selu oan nia eskola no responde mos nesesidade iha uma laran.
“semana ida ha’u tenke fila ba foho dala rua ,karik semana ida mak sasan la hotu maibe sasan ne’e la merese ona atu fa’an ha’u tenke lori fali ba foho no tenke hola fali sasan foun mak mai fali munisípiu atu fa’an fali.” Hakotu Nia.
Estajiada : Aldina Guterres.
Editor : Agapito de Deus
