Lafaek News-Sekretariu Estadu Komunikasaun Sosial (SEKOMS), Kinta, 03/10/2024, halo abertura ba atividade exposisaun obra husi estudante Departamentu Komunikasaun Sosial (UNTL), iha ne’ebé papel média iha tempu agora importante tebes ba sosiedade iha Timor-Leste.
Sekretariu estadu komunikasaun sosial (SEKOMS) Expedito Loro Dias Ximenes, relata katak, objetivu husi atividade exposisaun obra husi estudante komunikasaun sosial nian kona-ba foto jornalismu, reportajen eskrita, dezeñu-grafiku, video, seminariu, podcast, kompetisaun nomós animasaun, ne’e iha mensajen ne’ebé eselente ba públiku nomós ba estudante sira.
“Ita hatene katak iha prinsipiu baziku ba jornalismu ne’e, ida mak mensajen liuhusi foto, tanba foto ne’e rasik ko’alia liafuan rihun ida duke ita hakerek iha palavra atus ida, tanba ne’e, mensajen foto ne’ebé ohin alin estudante sira fó sai iha sira nia exposisaun obra jornalistiku nian, ida ne’e parte importante ida no diak tebes, tanba ida ne’e hanesan espresaun ne’ebé mak ema ida hadomi nia profisaun hanesan futuru hakarak sai jornalista”. Expedito konta.
Nia dehan, hanesan sira ne’ebé mai husi departamentu komunikasaun sosial, la signifika katak sira hotu sai ema jornalista, maibé minimu sira komprende oinsá mak nesesidade públiku ninian kona-ba informasaun, tanba alin estudante sira komprende kona-ba valor prinsipiu jornalismu nian, liu-liu oinsá mak sira sai hanesan ema ne’ebé preparadu atu sai lian, tilun, matan ba sira ne’ebé la hatudu lia-loos no justisa iha públiku”. Expedito relata.
“Husi pasu ida ne’e importante tebes ba alin estudante sira, tanba sira preparadu no kompriende kona-ba valor no forsa husi média iha nasaun ida ne’e, tanba ita apresia tebtebes iha fotografia barak ne’ebé alin estudante sira halo iha espresaun ne’ebé diak tebes, hatudu katak sira iha vokasaun duni atu sai ema jornalista iha públiku hodi sai lian, matan no tilun ba sosiedade, tanba papel média iha tempu agora sai hanesan matan, tilun ba públiku sira, tanba iha mundu interligadu iha ne’ebé informasaun sirkula ho velosidade ne’ebé makas no laiha kresiliente lesensiada atu ita refleta kona-ba oinsá média atu forma iha persepsaun realidade nian liga ba ema nia karakter iha sosiedade, tanba ne’e, atu komprende papel husi meiu komunikasaun sosial sira, ita presiza komprende didiak evolusaun husi tempu ba tempu”. Nia informa.
Entretantu Diretor departamentu komunikasaun sosial UNTL, Roberto da Costa Pacheco, haktuir katak, exposisaun ida ne’e, hanesan baibain kada tinan departamentu komunikasaun sosial halo, ho objetivu halo exposisaun ida ne’e, tanba estudante sira hetan materia foto jornalismu nomós sira seluk, husi obra ne’ebé mak estudante sira hetan foto no sira seluk, ho meius ida mak ita bele hatene katak estudante sira aprende duni ho koñesimentu ne’ebé mak sira iha.
“Tanba ne’e mak, kada tinan departamentu komunikasaun sosial halo exposisaun ba obra sientifiku ka fotografiku ba estudante sira, liu-liu iha semestre VI ba leten, liuhusi obra hirak ne’e, sei iha posiblidade ema balun hakarak sosa, bele sosa, alende ne’e mós ami sei ko’alia ho fakuldade, se bele obra hirak ne’e taka iha sala de auala sira ne’e hotu, atu nune’e ita bele hatene no haree katak sala de auala ne’e, iha ninia artistika, tanba ne’e husu ba estudante sira atu aproveita didiak saida mak professor sira hanorin nomós aprefesoa sira nia koñesimentu iha mundu jornalismu ninian, liu-liu iha foto jornalismu nian, tanba husi foto bele hato’o mensajen rihun ba leten, atu ema bele hatene no kompriende saida mak ema sente ka sosiedade sente hela”. Diretor departamentu komunikasaun sosial, hakotu.
Jornalista : Crispin de J. Amaral
Editor : Agapito de Deus
