Lafaek News—Prezidénsia Repúblika organiza eventu Car Free Day hodi komemora loron Proklamasaun Independénsia Timor-Leste ba dala-48, ho objetivu importante proteje meiu ambiente no saúde umana.
Prezidente Komisaun Organizadór ba eventu ne’e, Joel Maria informa, Prezidente Repúblika nia hanoin inisia programa ida ne’e, hodi enkoraza sidadaun hotu halo atividade ezersísiu ruma atu hetan saúde di’ak, segundu atu proteje an iha ambiente iha rai laran.
“Prezidente hanoin katak, ita haree ba volume transporte iha sidade laran, komesa aumenta ba bebeik husi tempu ba tempu, husi tinan ba tinan ita haree realidade aumenta. Ida ne’e bele fó kontribuisaun ba iha Poluisaun iha sidade laran,” hateten Prezidente KO, Joel Maria, iha Palásiu Prezidensiál Bairo-Pité Díli, (24/11/2023).
Tuir intendimentu Xefe Estadu nian, alénde hamosu engarafamentu, transporte hirak ne’e bele fó kontribuisaun ba aumenta emisaun kárbonu monoxida iha sidade, ne’e bele fó impaktu la diak ba ambiente, inklui mos ba ema nia saúde
Eventu Car Free Day ne’e, realiza iha areedór Ministériu Negósiu Estranjeiru no Kooperasaun Praia dos Coqueiros Díli, no priense ho atividade hanesan, halai no la’o saudável, ema ho defisiénsia halai taru bisikleta, fun bike, kompetisaun marsa no seluk tan.
“Primeiru mak halai saudável ka ita bolu dehan fun run, depois segundu fó oportunidade ba ita-nia maluk sira ho nesesidade espesiál (Ema ho Defisiénsia) para halai ho bisikleta liman ne’e, depois terseiru mak iha atividade fun bike, tuir fali mai ita sei iha kompetisaun marsa ba instituisaun Governu nian no komunidade em jerál, no ikus liu mak atividade fun walk ou la’o ho saudável,” dehan Joel Maria.
Rute ba la’o saudável nian, hahú husi Praia dos Coqueiros Díli, ba remata iha Ponte Prezidente Bacharuddin Jusuf Habibie iha Bidau Lecidere.
Fó hanoin katak, atividade ne’e inisiativa husi Xefe Estadu José Ramos-Horta, maibé servisu hamutuk ho parte Governu, liu-liu Ministériu Komérsiu Indústria hodi organiza vendedór sira iha área tasi-ibun hodi fornese be’e ba Partisipante sira, no mós hetan apoiu tékniku husi Ministériu Juventude, Arte no Kultura.
Eventu Car Free Day ne’e, hetan seguransa husi PNTL Munisípiu Díli liuhosi Departamentu no Unidade Tránzitu Seguransa Rodoviária no Unidade sira seluk hodi asegura eventu ne’e la’o ho diak.
Estajiada : Epifania I. Pinto
Editor : Agapito de Deus
