Lafaek News—Juventude Rejistensia no Militante Fretilin Abilio Mesquita “Dalas”, hateten istoria lider jerasaun 75 nia luta tenke valoriza no respeita hodi kontinua haklaken ba jerasaun foun iha futuru atu adora no respeita.
“Ha’u hanesan Militante Fretilin lamentavel teb-tebes ho atetude Ministériu Estatal nian liuhusi Vise Ministru Señor Rigoberto, I ne’e la’os edukasaun ne’ebe di’ak ba jerasaun foun sira,” lamenta Juventude Rezistensia no Militante Fretilin Abilio Dalas, relasiona ho fotografia lider istóriku Mari Alkatiri nian husi reklame ne’ebe mak prepara husi Komisaun Organizadora ba festa Proklamasaun Independénsia 28 de Novembru tinan ne’e.
Juventude rezisténsia ne’e realasa, nia parte rekomenda Governu atu eduka jerasaun foun sira ho didi’ak no tenke konta istoria ne’ebe lolos ba jerasaun foun sira, atu nune’e sira bele hatene no kumpriende di’ak liután kona-ba istória rai ida ne’e nian iha futuru no oinsá mós atu bele hatudu respeita ba lider rejisténsia no lider nasionál sira iha rai ne’e liuliu lider nasionál Mari Alkatiri.
Tuir Abilio, lolos ne’e fotografia husi lider nasionál Mari Alkatiri nian labele halo lakon iha reklame ne’ebe atu prepara ba festa proklamasaun independensia 28 de novembru tinan ne’e, tamba lider nasionaál Mari Alkatiri mós halo parte iha luta da libertasaun estado do diretu demokratika ne’ebe ohin loron ema hotu goza.
Juventude rezistensia no Militante Fretilin ne’e sente preukupadu no triste tebes ho hahalok husi komisaun organizadora nian ne’ebe latau konsiderasaun ba vigura Maria Alkatiri, se hanesan ne’e istoria rai ida ne’e nian neineik ba neineik sei lakon hotu.
Iha biba ne’e, juventude rezisténsia ne’e haktuir, nia parte la gosta Mari Alkatiri ne’e hanesan asaun normal ida, maibé hanesan lider nasional ne’ebé uluk hola parte iha luta libertasaun nasional ema hotu iha dever moral atu respeita no valoriza.
“Ha’u la gosta Mari Alkatiri ne’e normal, maibé nia hanesan ema lider nasional ida ne’ebé uluk hola parte iha luta libertasaun nasional, ita hotu tenke respeita, ema sira jerasaun 75 mak ita komesa ignora sa tán ami sira ne’ebé hanesan juventude rezisténsia ita la valoriza malu ona, nune’e ita halo konfuzaun istória ba ita nia oan sira iha future,” Abilio Dalas akresenta.
Entretantu, antes ne’e Vise Ministru Administrasaun Estatal, Jacinto Rigoberto hateten nia partes imu lamentasaun husi publiku, maibé hakarak deklara sinseramente laiha intensaun polítika atu hasai tiha fotografia husi lider nasional Mari Alkatiri.
Ekipa Kobertura : Lafaek News
