Lafaek News – Instituto Formasaun Profisionál no Vokasional Saun  João Baptista (IFPV-ISJB), Segunda (27/11/2023), realiza semináriu nasionál ho tema “Papél Juventude ho nia Kompeténsia Lideransa ba Dezenvolvimentu Nasionál iha futuru” hodi kapasita foinsa’e sira nia kontribuisaun ba rai ida ne’e.

 Tuir oradór potensiál nasionál, Nívio Leite Magalhaes hatete, polítika nasionál juventude ninian ba idade joven ne’e hahú husi 15 to’o 24 iha organizasaun barak liu-liu organizasaun juveníl ne’ebé liga ba polítiku dalaruma ema hotu hare’e katak lideransa sira ne’e mos hola parte ba idade ne’ebé mensiona hodi kapasita ba kontribuisaun dezenvolvimentu nasionál iha futuru.

“Kolega sira iha lokraik ida ne’e ita bele debate ba ida ne’e ne’ebé mak loos ka loos liu, maibé atu hatete de’it katak sei ita hare’e fali ba idade sira ne’ebé maka ohin ha’u temi no ita hare’e fila fali ba sensus ne’ebé maka iha tinan kotuk liu ba hare’e liu ba idade joven ne’e maka ho idade 15 to’o 24 ne’e a’as tebes, ida ne’e sai forsa bo’ot ida ba solusaun ba problema ne’ebé mak nasaun hasoru no ida ne’e mos bele sai forsa ida no kontribui ba instabilidade ba negativu i bele mos positivu, ha’u fiar katak iha ita bo’ot sira nia prezensa ida ne’e hatudu katak hakarak sai solusaun no ita bo’ot sira iha parte ida ne’e hakarak atu aprende barak hodi kapasita ita sira nia aan nune’e bele kontribui positivamente ba rai ida ne’e,” Nívio dehan.

Nia hatutan, Iha konstituisaun RDTL artigu 19 ninian ko’alia kona ba papél foinsa’e ninian nomós iha planu estratejiku dezenvolvimentu nasionál mos ko’alia kona ba juventude, tanbá ne’e maka ohin na’in hirak ne’ebé maka tuir iha ne’e no halo diskusaun kona-ba la’ós maka oinsá maka nasaun ne’e atu halo saida ba ita, maibé oinsá maka ita bele halo saida ba rai ida ne’e.

 “Ha’u husu ba ita bo’ot sira hanesan foinsa’e tenke iha ona hanoin ida atu bele kontribui ba rai ida ne’e labele hein de’it sai deputadu ka ministru maka foin bele halo buat, ida ne’e susar tebes ba ita bainhira maka ita bele halo netik buat ruma ba rai ne’e, ne’e duni idak-idak tenke iha ona hanoin atu halo netik ona buat,” katak Nívio.

 Iha fatin hanesan, Diretór IPV-SJB Manuel Pinto hatutan tan katak iha Instituto sentru formasaun ida ne’e hakarak halibur foinsa’e sira mai kapasita sira nia aan tuir programa ka área ne’ebé maka iha, nune’e bele transforma rai ida ne’e ba dezenvolvimentu nasionál liu husi siénsia ne’ebé maka aprende iha fatin ne’e, tanbá iha ne’e iha área hirak ne’ebé iha no bele transforma junetude sira sai joven potensiál no profisionál ida.

“Iha ne’e iha mos foinsa’e hamutuk na’in neen-nulu ne’ebé maka oferese sira nia aan ho servisu voluntáriu hodi fahe sira nia esperiénsia ba ita bo’ot sira, tanbá ne’e maka hakarak hatete ba ita bo’ot sira katak bazeia ba programa kursu ne’ebé maka iha ne’e iha maka hanesan formasaun lideransa, lian portugés, lian inglés, administrasaun finansa no seluk tan bele hare’e iha brosur ne’ebé iha, liu husi área hirak ne’e bele garante no kapasita ita bo’ot sira atu bele aprende hodi kontribui ba futuru dezenvolvimentu rai ida ne’e,” hakotu nia.

Jornalista : Paulo Collo

Editor         : Agapito de Deus