Lafaek Newas–Estadus Unidus no Timor-Leste Asina Arrendamentu ba Fatin Diplomátiku Foun sira
Arrendamentu hirak ne’e sei permite Estadus Unidus no Timor-Leste hodi hametin engajamentu diplomátiku.
Loron 12 Agostu 2022, Dili, Timor-Leste – Enkaregadu Negósiu Estadus Unidus Tom Daley no Ministru Justisa Tiago Amaral Sarmento ohin asina ona akordu arrendamentu ba tempu naruk ba propriedade diplomátiku sira nasaun rua ne’e nian iha Timor-Leste no Estadus Unidus Amérika.
Akordu arrendamentu hirak ne’e asina mós iha Nova Iorke husi Embaixadór Timor-Leste ba Estadus Unidus Isilio Coelho no Timor-Leste nia reprezentante ba ONU, Embaixadór Karlito Nunes, Liuhusi arrendamentu hirak ne’e, Governu Estadus Unidus Amérika no Governu Timor-Leste, konkorda ona hodi arrenda propriedade diplomátiku sira ne’ebé sei permite nasaun rua ne’e atu hametin liután engajamentu diplomátiku. Akordu ne’e fó dalan ba governu Estadus Unidus Amérika hodi halo arrendamentu ba ninia Embaixada nia propriedade imóvel ne’ebé eziste iha Dili no Governu Timor-Leste bele halo arrendamentu ba nia Embaixada nia fatin foun ida iha Washington no fatin foun ida ba Timor-Leste nia Misaun ONU iha Nova Yorke, termu arrendamentu hirak ne’e ninia durasaun to’o tinan 50 no automatikamente sei renova no hanaruk tan ba tinan 50.
“Asina kontratu arrendamentu ohin loron nian hanesan garantia ida importante tebes kona-ba ami-nia kompromisu ba tempu naruk ho Timor-Leste,” haktuir Enkaregadu Negósiu Estadus Unidus Tom Daley iha nia diskursu bainhira asina akordu arrendamentu iha Ministériu Negósiu Estranjeiru no Kooperasaun. “Ikus liu, ida-ne’e signifika katak ita bele promove ho di’ak liután pilár fundamentál hirak ne’ebé mak define relasaun bilaterál entre Estadus Unidus Amérika no Timor-Leste, hanesan: belun, parseria, no oportunidade sira.
Asinatura ohin loron nian seipermite ita hodi dezenvolve bazeia ba ita-nia parseria demokrátika iha dékada hirak tuir-mai hodi promove liután povu Timor-Leste no Amerikanu sira-nia intereses.”
Embaixada Estadus Unidus Amérika iha Dili hari’i iha tinan 20 liubá nu’udar estrutura temporáriu ne’ebé la adekuadu atu apoia parseria ne’ebé aumenta entre Estadus Unidus no Timor-Leste, Governu Estadus Unidus iha planu atu hari’i edifísiu Embaixada ida ne’ebé foun, modernu atu nune’e akomoda pesoál sira diplomátiku, defeza no dezenvolvimentu nian hodi serbisu ba hametin Estadus Unidus Amérika no Timor-Leste nia parseria. remata
